DILI, 29 janeiru 2024 (TATOLI) – Vítima afetada husi dezastre naturál hamutuk 701 iha territóriu hetan, iha semana ne’e, apoiu emerjénsia husi Autoridade Protesaun Sivíl (APC, sigla portugés). Dezastre ne’e kauza husi anin-boot, rai-halai no ahi-han uma.
Xefe Seksaun Relasaun Esterna APC, Nelson Nunes de Orleãs, relata katak dezastre ne’e akontese, entre loron 23 no 29 janeiru, no uma hamutuk 211 mak hetan estragu no afeta vítima 701 maka sai refujiadu. Tuir informasaun, vítima sira balun hela iha edifísiu APC munisípál sira no seluk hela iha uma viziñu.
“Ba uma sira ne’ebé maka daudaun ne’e hetan estragu kauza husi dezastre naturál ne’e, ita-nian ekipa sira iha ona terrenu hodi foti dadus, inklui halo verifikasaun atu identifika gravidade husi uma sira, nune’e bá oin bele iha intervensaun ruma”, Nelson Nunes hatete iha konferénsia imprensa ne’ebé hala’o iha edifísiu APC, iha Caicoli, ohin.
Tuir dadus APC, dezaste iha munisípiu Aileu anin sobu uma rua, Ainaro neen, Baucau 10 no ahi-han uma rua. Bobonaro anin sobu uma 12 no rai-halai estraga uma hitu. Covalima anin sobu uma sia no ahi han uma haat, Ermera anin sobu uma 17 no rai-halai estraga uma haat, Lautém anin sobu uma sia, Liquiçá 31, Manatuto anin sobu uma haat no ahi han uma rua, Manufahi anin sobu uma tolu no ahi han uma ida, Oé-Cusse anin sobu uma 44 no ahi han ida no Viqueque anin sobu uma 11 no ahi han uma rua.
Akontesimentu dezastre naturál iha territóriu ne’e APC fó ona apoiu ai-han hanesan foos supremie, mina, masin ba vítima sira no ba uma 211 ne’ebé hetan estragu ne’e diresaun sei halo hela verifikasaun atu define tuir ninia kategoria.
“Ita-nian maluk vítima sira hetan ona apoiu emerjénsia husi Governu no ba problema uma sira ne’ebé hetan estraga, ekipa sira sei halo hela verifikasaun ba dadus nune’e bele halo kalkulasaun katak vítima sira-nian uma hetan estragu tama iha tipu saida”, reitera.
Vítima dezastre naturál ne’ebé kauza husi anin sobu uma, iha Suku Fatuleto, Covalima, Albito Loe Dasi, hatete nia, ferik-oan no labaraik na’in-haat hela provizoriamente ho família sira hodi hein tulun husi Governu, tanba sira seidauk hetan apoiu emerjénsia.
Xefe Suku Fatuleto, Manuel Barreto, konfirma katak anin boot sobu uma sia no relata ona dadus ba APC atu vítima sira hetan tulun.
Anin sobu abitante nia uma sia iha suku Fatuleto, liuliu iha aldeia Biata uma tolu, Fatuleto uma rua no Kolu uma haat.
Komandante APC Covalima, Inspetór Xefe Flávio dos Santo Mendes, hatete dadaun ne’e seidauk halo verifikasaun ba vítima dezastre naturál sira iha parte foho, tanba ekipa sira foku halo verifikasaun iha rai-tetuk.
Notísia relevante: APC rejista uma 49 hetan estragu no ema na’in-haat lakon vida
Jornalista : Tomé Amado/Celestina Teles
Editoa: Maria Auxiliadora
