iklan

OPINIAUN

Pertanian Timtim versus Agrikultura Timor-Leste

Pertanian Timtim versus Agrikultura Timor-Leste

Hakerek-na’in: Quintiliano Afonso Belo

Dezenvolvimentu setór agrikultura iha Timor-Leste depois tiha URA seidauk lori mudansa signifikativu durante 20 anos. Tuir dadus husi Sencos agrikolas hatudu persentajen uma-kain ne’ebé haksumik knaar hanesan agrikultór porvolta 65%. Katak maioria uma-kain iha Timor-Leste dependidu ba setór ida ne’e nu’udar aliserse ba ekonomia familiar hodi bele augenta moris. Haree mós husi dadus ida ne’e maka polítika ba Dezenvolvimentu ekonomia nasionál, setór ida ne’e mós hetan atensaun ho alokasaun programa no orsamentu iha kada tinan nia trend la’ós aat liu. Bele dehan setór Ekonomia sub-setór agrikultura hetan mós atensaun primeiru depois setór infrastrutura no setór sosiál.

Loos duni katak, dezenvolve Estadu ida tenki integradu no labele husik sira seluk lao hakdasak. Maibé, setór agrikultura diferenti no lahanesan ho setór sira seluk ne’ebé halo ema sai objetu. Karik iha setór Agrikultura mak utiliza aprosimasaun Agrikultór sai nu’udar Objetu, fiar ka lafiar sei la funsiona no la la’o hanesan realidade hatudu ona durante dekada rua nia laran. Maske governu insentiva modelu oioin.

Biar nune’e, Agrikultura la’ós buat foun. Iha teoria hateten no hakerek barak-barak ona kona-ba agrikultura. Iha nia implementasaun dala ruma teoria kontradiz ho rekursu lokál ezistenti ho egoismu iha aprosiamasaun sira. Nune’e prátika agrikultura sai tiha fali buat foun no ikus liu la funsiona no agrikultura hakdasak.

Hanesan públiku hatene katak, kada governu eskolla agrikultura hanesan eixu prinsipál mós ba dezenvolvimentu ekonomia, maibé dalaruma kada polítika haluha tiha katak, aprosimasaun ne’ebé utilizadu sala no laloos. Nune’e lori agrikultura Timor-Leste hetok sai aat liu fali Pertanian Timtim.

Kada polítika iha sira-nia espetativa no dezeju lahanesan iha setór agrikultura. Barak liu hanoin atu halo agrikultura sai modernu nune’e bele lori rendimentu ba ekonomia nasaun nian. Sira seluk mós hanoin bele ka lae agrikultura sai fontes ekonomia Timor-Leste nian. Uitoan liu mak hanoin oinsá utiliza rekursu ezistenti hodi mellora agrikultura sai agrikultura ne’ebé sustentavel, alende importa bele mós exporta. Hanesan nasaun Japaun no Singapora halo ona. Ne’e hotu bele akontese no la’ós imposível atu akontese. Maibé, bainhira ita hotu sei sukat ba mai, see mak makaas liu no see mak forsa liu. Espetativa no dezeju sira sei lakon leet de’it sein iha rezultadu signifkavu.

Karik, ita hotu lembra katak, uluk Pertanian Timor-Timur nian (20 anos momentu ne’ebá) dolog sira nakonu ho foos lokál ne’ebé agrikultór produz, tanba sa agora labele kópia tuir? Makaas liutan maka Timor Timur konsege fó han aan rasik sein hein husi Jakarta. Bele dehan mós katak, moris povu agrikultór nian iha momentu ne’ebá di’ak uitoan maske moris iha presaun nia laran. Ha’u dehan nune’e, tanba hanesan agrikultór nia oan senti mós rezultadu produsaun sira nu’udar agrikultór. Sira konsege sosa Microlet, motor no trator sira sein deve iha banku, até haruka oan sira ba Eskola iha rai-li’ur hodi hasai kursu diploma. Signifika Pertanian Timtim sei di’ak liu kompara ho Agrikultura Timor-Leste ohin loron nian.

Pergunta mak ne’e; seraque osan no rekursu mak lato’o? Tanbasá Timoroan rasik de’it labele? Bainhira Pertanian Timor-Timor hahú husi kargu estruturál no funsionál dominadu husi Batak, Makasar no Balines konsege bele durante tinan 20 anos?

Pergunta rua ka tolu iha leten la presiza resposta, bainhira Timor-oan hotu onestu. Tanba realidade hatudu katak, Timor-oan sira okupadu liu oinsá atu hatuun no hasa’e, hapara no extende malu bainhira kose di’ak, bainhira ami nian de’it no la’ós ita nian.

Ho forma seluk atu dehan katak, Timor-Leste lakon tempu barak liu, atu halo dezenvolvimentu setór agrikultura ho sériu. Pior liu tan hatene de’it fó sala ba agrikultór no nunka konsiente an katak; aprosimasaun ne’ebé utiliza hodi dezenvolve setór agrikultura expiradu ona.

Iha Tinan ba tinan, Timor-Leste hakilar atu hasa’e produsaun, maibé, produsaun la sa’e de’it. Tinan tinan mós Timor-Leste hakilar ba produsaun foos ne’ebé menus ba bei-beik. Tanba ne’e, tuir ha’u-nia hanoin maka, la’ós ona tempu atu soe sala ba malun. Katak ó di’ak liu, nia di’ak liu no seluk mak aat liu. Tempu ona atu hotu-hotu hamutuk buka solusaun di’ak ho aprosimasaun ida ne’ebé korektu, hodi dezenvolve setór Agrikultura Timor-Leste pelu menus sai hanesan Pertanian Timtim no mehi tenki di’ak liu iha tinan sira oin mai.

Solusaun ne’e oinsá? Mai ita hamutuk buka iha Google no AI. La’ós tempu mós atu fó solusaun ba malun; nufim konfuzaun rasik.

iklan
iklan

Leave a Reply

iklan
error: Content is protected !!