DILI, 30 janeiru 2024 (TATOLI)—Autoridade Aduaneira (AA)/Alfándega tinan ne’e sai uma-na’in ba reuniaun Konsellu Diretór Jerál Alfándega Komunidade País Lian Portugés (CPLP, sigla portugés).
Komisáriu Alfándega, José António Fátima Abílio, hateten, reuniaun ne’e realiza kada tinan rotativamente, katak tinan ida nasaun ida mak sai hanesan anfitriaun, ne’ebé tuir loloos Timor-Leste sai uma-na’in hosi eventu hanesan iha tinan 2022 liuhosi enkontru virtuál, maibé tanba matéria barak presiza diskusaun kle’an, maka konsellu propoin atu realiza iha tinan kotuk, ikus mai la konsege nafatin no foin realiza iha tinan-ne’e.
“Reuniaun ne’e iha objetivu rua hanesan, fó kontinuasaun ba enkontru diretór jerál anteriór (2022) ne’ebé Timor-Leste sai hanesan anfitriaun maski liuhosi virtuál. Objetivu seluk atu haree kontinuasaun ba Programa Integradu Kooperasaun no Asisténsia Téknika (PICAT) entre nasaun membru CPLP, inklui mós planu estratéjiku, tanba primeiru enkontru ne’e seidauk estruturadu maibé bainhira ita iha PICAT fim ona, entaun programa ne’e estruturadu ona, tanba ne’e iha regularmente no nasaun membru CPLP mak deside,” Komisáriu relata ba jornalista sira, iha Auditóriu Ministériu Finansa, Aitarak-laran, tersa ne’e.
Notísia relevante : ANP no Alfándega introdús desalfandegamentu petróleu refinadu liuhosi plataforma interkoneksaun
Reuniaun ne’e haree mós desizaun sira ne’ebé antes ne’e konsellu hasai inklui preparasaun ba reuniaun tuir mai iha Ângola.
“Ho objetivu rua ne’e atu hametin liután lasu amizade entre nasaun membru CPLP, nune’e mós iha programa transversál entre membru, liu-liu liga ho planu estratéjiku,” nia akresenta.
Nune’e, diresaun jerál Alfándega sira hakarak servisu hamutuk atu buka rezolve kestaun ne’ebé liga ho fasilitasaun komérsiu ho mundu dijitalizasaun hosi interligasaun sistema, halo ajustamentu aliñamentu enkuadramentu legál, prepara infraestrutura atubele akomoda no fasilita troka informasaun entre sistema eletrónika hosi nasaun CPLP inklui nasaun membru ASEAN.
Reuniaun nível a’as ne’e nu’udar oportunidade ida hodi promove identidade nasaun nian, liu-liu lian ofisiál.
“Tanba ne’e ita haree katak Organizasaun Mundiál Alfándega ne’e, liu-liu nasaun membru CPLP hakarak hatudu mós identidade hodi promove lian portugés tanba ita-nia lian ofisiál portugés ho tetun liuhosi eventu internasionál no buka haree lakuna ne’ebé estasaun aduaneira sira iha atubele dezenvolve programa atu iha nasaun CPLP sira seluk mós ita la’o iha ritmu ein termu fasilitasaun komérsiu,” nia tenik.
Komisáriu rekoñese, Alfándega Timor-Leste durante ne’e hasoru dezafiu tanba lian ofisiál portugés, tanba ne’e tenke esforsu-an ko’alia portugés bainhira partisipa iha reuniaun nível a’as sira.
“Ne’ebé buka atu apreende lian portugés tanba konferénsia boot sira obrigatóriamente ko’alia lian portugés. Ho nune’e presiza kapasitasaun rekursu, pesoál hirak ne’ebé identifikadu partisipa formasaun tenke hatene portugés hodi absorve matéria sira ne’ebé ho lian portugés,” nia sujere.
Eventu internasionál ne’e realiza durante loron-haat, hahú hosi loron 30 janeiru to’o 02 fevereiru 2024, ne’ebé iha loron ikus reuniaun sei deside estabelese akordu konjunta ho tópiku servisu OMA.
Jornalista : Antónia Gusmão
Editora : Julia Chatarina
