Ró-ahi Berlin Nakroma la halo operasaun durante semana ida ona

DILI, 30 janeiru 2024 (TATOLI)—Prezidente Autoridade Portuáriu Timor-Leste, Institutu Públiku (APORTIL, I.P), Feliciano da Costa Correia, hateten, Ró-ahi Berlin Nakroma la halo operasaun durante semana ida ona.

“La’ós nia mákina ruma mak avaria maibé ró nia ramp door (dalan tama ró) mak hetan estragu bainhira halo embarkasaun nomós debarkasaun iha parte portu sira ne’ebé tuir nia rota,” Feliciano da Costa, informa ba Agência Tatoli, iha ninia knaar fatin, Portu Dili, tersa ne’e.

Nia dehan, ramp door ne’ebé avaria ne’e tanba kondisaun klima hanesan anin no laloran boot.

“Asuntu ida-ne’e haree kiik maibé APORTIL hanesan operadór konsidera avariasaun ida-ne’e la fó seguru bainhira halo karregamentu no deskarregamentu. Entaun ita presiza hadi’a lai mak halo fali operasaun. Daudaun APORTIL rasik halo hela identifikasaun no preparasaun atu hadi’a hodi garante konektividade,” nia akresenta.

Notísia relevante : Ró-ahi Berlin Nakroma to’o hikas Dili hafoin manutensaun iha Surabaya

Molok halo konektividade APORTIL sei halo reparasaun ba ró ne’ebé halo ona operasaun desde tinan 2007 to’o agora.

“Tanba ne’e presiza halo reparasaun edekuadu hodi asegura transportasaun ema ho seguru hosi portu ida ba portu seluk,” Prezidente APORTIL reforsa.

Ho kondisaun ne’e, operasaun Dili bá Ataúro paradu, ne’ebé konetividade ne’e asegura hosi ró-ahi Success, enkuantu bá Oé-cusse provizóriumente ró-ahi Berlin Ramelau mak halo hela operasaun.

Ekipa téknika daudaun sei identifika kustu hodi prevee orsamentu, nune’e bele halo manutensaun iha rai-laran.

Jornalista     : Arminda Fonseca

Editora          : Julia Chatarina