BTL,E.P Viqueque arrekada reseita $21,139.10 ba kofre Estadu
VIQUEQUE, 31 janeiru 2024 (TATOLI)-Bee Timor Leste, Empreza Públiku (BTL,E.P) munisípiu Viqueque, hosi loron 1 janeiru to’o 31 dezembru 2023, konsege arrekada reseita hamutuk $ 21,139.10 ba kofre estadu.
“Iha tinan 2023, ami konsege rekolla reseita husi bee nian hamutuk $21,139.10 ba kofre Estadu no orsamentu sira-ne’e mai husi ita-nia benifísiariu sira-ne’ebé uza bee-moos iha kapitál Viqueque, selu bazea ba instalasaun metru kontadór ba uma-kain sira”, Koordenadór BTL,E.P munisípiu Viqueque, Marito da Costa,hateten ba Agência TATOLI,I.P iha ninia kna’ar fatin, Beloi, kuarta ne’e.
Husi total reseita $21.139.10, kompostu hosi janeiru rekolla reseita $1,856.90, fevereiru $1,543.60, marsu $1,845.20, abríl $797.40, maiu $1,624.40, juñu $1,296.60, jullu $1,307.60, agustu $1,248.00, setembru $1,099.20, outubru $2,160.30, novembru $ ,035.80 no dezenbru $ 5,324.10.
Iha tinan 2023, BTL.E.P munisípiu Viqueque konsege monta kontadór ba zona Beloi no zona Lamac Laran, suku Caraubalu, postu Viqueque Viqueque Vila. Enkuantu zona sira seluk BTL.EP sidauk kobre hotu hodi monta metru kontadór ba utilizasaun bee-moos.
“Daudaun ne’e, ami foin kobre zona Beloi, zona sira seluk iha kapitál Viqueque seidauk tanba iha limitasaun estoke ba materiál ka kontadór ne’ebé distribui mai munisípiu Viqueque. Nune’e ba tinan 2024, ami sei esforsu hodi kontinua aumenta metru kontadór tanba empreza hakarak buka osan hodi sustenta ita-nia estadu no sei halo meloramentu ba kanu transmisaun bee-moos”, Koordenador ne’e kompromete.
Kona-ba rekursu bee husi Loihunu 20 litru pur segundu distribui ba abitante sira iha kapitál Viqueque ne’ebé uza instasaun kontadór hamutuk uma-kain 400, ne’ebe BTL,E.P monta ona kontadór.
Enkuantu, tuir dadús benifísiariu hamutuk uma-kain 400 ne’ebé maka instala ona kontadór iha zona Beloi. Enkuantu, númeru uma-kain suku ne’ebé iha kapitál Viqueque iha suku Caraubalu totál aldeia hitu ho totál uma-kain 1.097, ho totál abitante na’in-65.922.
Husi númeru ne’e, uma-kain 400 monta ona kontadór no uma-kain 697 balun seidauk asesu bee no balun asesu bee, maibé seidauk kontadór. Enkuantu suku Uma-Ki’ik ne’ebé besik kapitál Viqueque seidauk asesu ba bee-moos hamutuk uma-kain 1.139 ho totál abitante na’in-3.459.
Jornalista : Vitorino Lopes da Costa
Editór : Florencio Miranda Ximenes
