EDTL troka ona transformadór eletríku iha Fatuisin
COVALIMA, 31 janeiru 2024 (TATOLI) – Tékniku Eletrisidade Timor-Leste, Empreza Públika (EDTL,E.P) Covalima troka ona transformadór eletríku, nune’e komunidade iha ldeia Fatuisi, suku Camnasa, munisípiu Covalima bele asesu fali ona enerjia elétrika.
“Ita-nian ekipa téknika husi EDTL Covalima troka transformadór foun iha sesta, 26 janeiru, nune’e komunidade iha aldeia Fatuisin asesu ona eletrisidade ho normál”, Xefe aldeia Fatuisin, Manuel Amarál, relata ba Tatoli, ohin.
Lembra katak abitante sira iha aldeia refere la asesu eletrisidade, durante semana ida, hafoin transformadór keima, tanba ne’e EDTL Covalima hato’o proposta ba iha nasionál hodi haruka transformadór foun, tanba durante laiha enerjia elétrika komunidade uza de’it lampu tradisionál hodi halo atividade.
Xefe suku Camnasa, Fernando Noronha, relembra katak hanesan líder suku iha responsabiliade ba nia populasaun no bainhira rona informasaun katak ahi mate, iha loron 22 bá hasoru kedas Xefe Unidade EDTL Covalima atubele rezolve kestaun ne’e.
“Iha loron 22 janeiru, ha’u bá hasoru xefe EDTL Covalima no nia mós viajen kedas bá iha nasionál nune’e fila mai tékniku EDTL,E.P troka kedas tranformadór ne’ebé keima”, dehan.
Tuir dadus, aldeia Fatuisin iha uma-kain hamutuk 300-resin.
Notísia relevante: Semana ida ona komunidade iha aldeia Fatuisin la asesu eletrisidade
Jornalista: Celestina Teles
Editora: Maria Auxiliadora
