iklan

COVALIMA, HEADLINE

Semana ida ona komunidade iha aldeia Fatuisin la asesu eletrisidade      

Semana ida ona komunidade iha aldeia Fatuisin la asesu eletrisidade      

Xefe Aldeia Fatuisin, Manuel Amaral. imajen/Celestina Teles.

COVALIMA, 22 janeiro 2024 (TATOLI) – Komunidade iha aldeia Fatuisin preokupa tanba ahi mate durante semana ida no to’o ohin loron seidauk lakan ne’ebé kauza husi tranformadór elétriku keima.

“Ahi mate komesa iha semana kotuk to’o ohin-loron seidauk lakan no difikulta ami.  Ami tenke uza lampu tradisionál nune’e iha kalan bele hetan naroman”, Xefe aldeia Fatuisin, suku Camnasa, Manuel Amaral lamenta.

Aleinde komunidade uza lampu tradisionál, sira mós difisil atu asesu ba bee-moos no tenke konsumu bee-posu hodi uza ba sira-nian nesesidade loroloron. Tanba ne’e, autoridade suku husu ba tékniku sira Eletrisidade Timor-Leste, Empreza Públika (EDTL, E.P) tenke rezolve lalais kona-ba problema refere.

Iha sorin seluk, sefe suku Camanasa, Fernando Noronha, dehan líder suku iha reponsabilidade atu rezolve problema ne’ebé komunidade sira hasoru hanesan ahi mate durante semana ida ne’e.

“Ha’u iha informasaun katak aldeia Fatuisin nia ahi mate durante semana ida ona, maibé tanba ha’u okupadu ho serbisu seluk seidauk informa ba tékniku Eletrisidade Timor-Leste munisípiu Covalima. Ha’u preokupa ahi mate durante semana ida ne’e bele estraga komunidade sira-nia sasán eletróniku hanesan jeleira no seluk tan”, realsa.

Bazeia ba dadus, aldeia Fatuisin,  suku Camanasa, postu administrativu Suai, iha totál  uma-kain hamutuk 300-resin

Eis-Xefe Unidade EDTL Covalima, Alexandre Seran, klarifika katak ahi mate semana ida ona tanba transformadór elétriku mak keima no sira hato’o ona pedidu ba iha nasionál, maibé to’o ohin loron seidauk iha resposta.

“EDTL Covalima hato’o pedidu ba iha nasionál, maibé tanba tékniku balun sei halo servisu iha Lautém ne’e mak seidauk transporta trafo mai iha Covalima. Ami hein de’it transporta trafo mai ami troka kedas, nune’e komunidade sira bele asesu ahi ho normál”, nia salienta.

Funsionáriu kontratadu ne’ebé serbisu iha Eletrisidade Timor-Leste Covalima hamutuk na’in-33.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!