DILI, 31 janeiru 2024 (TATOLI)—Parlamentu Nasionál (PN) seidauk iha desizaun atu halakon Konsellu Konsultivu Fundu Petrolífeiru (KKFP).
Notísia Relevante: Posibilidade Parlamentu Nasionál sei halakon KKFP
Prezidente Parlamentu Nasionál (PPN), Maria Fernanda Lay, hateten ohin nia-parte konvoka reuniaun ho líder bankada parlamentár tanba iha pedidu enkontru ho sira, nune’e sorumutu ne’e hodi rona sira-nia hanoin atu halakon KKFP ka mantein hodi hadi’a lei ezistente hosi KKFP rasik.
“Iha enkontru ohin seidauk iha desizaun atu halakon ou hadi’a lei ne’e. Nune’e, konvoka reuniaun atu hamoos tiha Konsellu Konsultivu Fundu Petrolífeiru, maibé ita atu hamoos tiha ka hadi’a lei. Hatene, razaun tenke fundamenta, hadi’a tiha lei mak halakon ou mantein hadi’a lei. Ne’ebé, ohin, ami liuliu líder bankada parlamentár tanba sira mak deside, ha’u labele deside mesak,” nia hateten ba jornalista sira hafoin reuniaun líder bankada iha sala konferénsia PN.
Entaun, líder bankada sira tenke fó hanoin ba sira halo ona pedidu ida mai, atu iha reuniaun líder bankada atu hadi’a lei ne’e tanba lei ne’e aprova dezde iha 2005, no nunka hanoin atu hadi’a liga ho reprezentasaun KKFP ne’e rasik.
Ne’ebé, nia dehan, iha artigu 26 hatete eis Prezidente Repúblika com mais tinan tolu, Primeiru Ministru, Prezidente Parlamentu inklui Ministru Finansa no sira seluk tan, ne’ebé grupu ida iha ema na’in-sia (9) ka 10.
Nia dehan, iha lei KKFP iha mós artigu 27 númeru 4 hateten kazu Prezidente Repúblika ho entidade titular sira-ne’e laiha, sira tenke fó sira-nia reprezentasaun maibé durante kuaze tinan 20 laiha.
“Ida-ne’e mak halo ami hanoin, liuliu ha’u tanba ita tau buat oioin iha lei. Tanba, titulár sira tenke fó konsellu ba Deputadu sira atu foti desizaun liga ba ita-nia fundu mina-rai. Se ne’e laiha, ita tenke iha hanoin ita altera lei ou halakon tiha KKFP,” nia hateten.
Iha enkontru ohin seidauk iha desizaun, klaru katak nia-parte sei lori fila-fali ba titulár sira tanba durante ne’e laiha reprezentasaun ida-ne’ebé fó mós impaktu ba nia kórum, tanba kórum se iha ema na’in-sia (9) ka 11, ne’e interpretasaun lei.
Nune’e, nia-parte fó ona ida ne’e ba asesór legál sira haree formulasaun ezbosu ida tenke mai ho hanoin no halo konsulta hodi halo desizaun ida di’ak-liu.
“Ita halo tiha lei no laiha prosedimentu atu hili ema-ne’e susár. Entaun, lei halo tenke iha regra prosedimentu. Se lae, ita atu implementa halo oinsá. Tanba ne’e, lei ne’e bainhira aprova ita fó prazu ida hodi bele halo prosedimentu sira-ne’e,” nia dehan.
Notísia Relevante: Aniceto Guterres Fó Pose Juvinal Dias Nu’udar Prezidente KKFP
Jornalista : Nelson de Sousa
Editór : Cancio Ximenes
