DILI, 31 janeiru 2024 (TATOLI)—Ajénsia Teknolojia no Komunikasaun, Institutu Públiku (TIC Timor, I.P) planeia ona atu dijitaliza atendimentu públiku ba ministériu haat, iha tinan 2024.
Ministériu haat ne’e mak hanesan Ministériu Saúde (MS), Ministériu Edukasaun (ME), Ministériu Administrasaun Estatál (MAE), no Ministériu Agrikultura, Pekuária, peska no Floresta (MAPPF).
“TIC hakarak ezije tau prioridade ba ministériu haat ne’e iha tinan 2024 tanba sira halo atendimentu to’o suku, ne’ebé iha tinan ida-ne’e parte aplikasaun sei halo estudu viabilidade uluk hodi haree nesesidade, nune’e iha tinan 2025 bele implementa,” Diretór Ezekutivu TIC Timor, I.P, Venâncio Pinto, hateten, liuhosi programa entrevista eskluziva live streaming, iha estúdiu Agência Tatoli, Farol, kuarta ne’e.
Nia dehan, bainhira ministériu haat implementa ona iha tinan 2025, atu dijitaliza sistema iha ministériu seluk ne’e fásil ona. Hanesan Ministériu Justisa ne’ebé iha ona sistema integradu, hein tau hamutuk hosi ministériu ida ba ministériu seluk sai portál ida ka balkaun úniku hanesan www.tl (iha faze dezenvolvimentu) ne’ebé hakarak trata dokumentu ida hein loke de’it portál ne’e.
“Ekipa daudaun hahú trasa planu, nune’e iha fulan-marsu tinan ne’e sira tun ona halo estudu viabilidade. Rekursu TIC seidauk sufisiente maibé daudaun bele la’o ho timor-oan sira ne’ebé iha abilidade iha rede no data center,” nia akresenta.
Notísia relevante : TIC Timor planeia kria aplikasaun online trata karta kondusaun no kir
Iha sorin seluk, TIC Timor planeia hela atu halo rekrutamentu ba ema ne’ebé iha abilidade dezenvolve sistema anroid, ne’ebé fó prioridade ba timor-oan.
“Ho rekursu na’in-16 ba dezenvolve sistema sira ne’e naton, maibé normalmante atu forte liu presiza to’o 20 hodi tau-matan ba website, aplikasaun, treinamentu, maibé kona-ba rede no data center sufisiente hela tanba daudaun rekursu naton,” nia relata.
Razaun TIC halo dijitalizasaun ba atendimentu públiku iha ministériu sira hanesan MAE tanba daudaun autoridade lokál ida lori relatóriu tahan ida tenke to’o iha Dili.
“Ida-ne’e sei hasai despeza boot hanesan enxe mina ba karreta, gasta tempu depois tenke iha osan, buat hirak ne’e la efikásia,” Diretór haktuir.
Ho kestaun hirak ne’e maka iha hanoin atu kria aplikasaun online hodi relatóriu sira bele tau iha sistema hodi manda ba nasionál. Aleinde ne’e, dokumentu Estadu bainhira tau iha sistema ida, bainhira troka governasaun, dokumentu sira sei la lakon no iha memória institusionál, nune’e bele minimiza surat-tahan.
Molok kria sistema sira ne’e, TIC Timor daudaun apoia hela formasaun ba Administradór sira, nune’e bainhira estudu viabilidade ramata hein implementa sistema.
Jornalista : Antónia Gusmão
Editora : Julia Chatarina
