LIQUIÇÁ, 01 fevereiru 2024 (TATOLI)–Autoridade Inspesaun Fiskalizasaun Atividade Ekonómika, sanitária no Alimentár, Institutu Públiku (AIFAESA, I.P) planeia ona iha tinan ne’e sei halo rekrutamentu ba funsionáriu tékniku hodi destaka iha munisípiu Baucau, Bobonaro, Covalima inklui Rejiaun Administrativa Espesiál Oé-cusse Ambeno (RAEOA).
“Ha’u atu hateten katak AIFAESA, I.P tinan ne’e sei halo rekrutamentu ba funsionáriu tékniku foun hamutuk 25 tanba tinan ne’e ita mós aprova orsamentu ba servisu deskonsentralizasaun iha munisípiu tolu inklui RAEOA hodi halo atividade,” Inspetór Jerál AIFAESA, I.P, Ernesto Moneteiro, hateten iha Portu Tibar, kinta ne’e.
Notísia relevante : AIFAESA,I.P nia atividade paradu provizóriamente tanba funsionáriu 118 termina kontratu
Funsionáriu ne’ebé sei rekruta sei hala’o atividade rutina hanesan inspesaun no fiskalizasaun atividade ekonómika sira.
“Kada munisípiu destaka ema na’in-lima, maibé ita sei haree ema ne’ebé iha ona esperiénsia tinan barak mak ita hili, hosi sira ne’e bele funsionáriu ne’ebé kontratu ramata ona no balun bele foun,” nia akresenta.
AIFAESA, I.P hili uluk munisípiu sira ne’e halo deskonsentralizasaun tanba iha parte leste bele kobre Baucau, Viqueque, Lautém no Manatuto, enkuantu parte oeste bele kobre Bobonaro, Covalima no seluk tan.
Daudaun ne’e institutu públiku ne’e foku uluk ba munisípiu tolu ne’e, nune’e baihira iha ona progresu di’ak maka ba oin sei halo rekrutamentu funsionáriu destakadu ba munisípiu sira seluk.
Orsamentu alokadu ba AIFAESA,I.P iha tinan ne’e hamutuk $2.468.595, ne’ebé inklui verba balun ba servisu deskonsentralizasaun nian.
Daudaun ne’e, atividade rutina institutu públiku ne’e seidauk funsiona tanba funsionáriu na’in-118 kontratu ramata iha loron 31 dezembru 2023 no to’o agora seidauk iha rekrutamentu foun ka extensaun.
Jornalista : Arminda Fonseca
Editora : Julia Chatarina
