EDTL tinan ne’e deklara territóriu Timor-Leste asesu hotu ona enerjia eletrisidade
DILI, 02 fevereiru 2024 (TATOLI)—Eletricidade de Timor-Leste (EDTL), tinan ne’e, sei dada hotu ona ahi eletrisidade ba suku no aldeia, nune’e sei deklara katak territóriu Timor-Leste asesu hotu ona enerjia eletrisidade.
“Porsentu 98 mak asesu enerjia eletrisidade, falta de’it suku neen mak seidauk asesu maibé tempu badak ami sei halo esforsu hotu, nune’e tinan ne’e ita bele deklara iha territóriu Timor-Leste bele asesu hotu ona ahi eletrisidade tanba daudaun prosesu konkursu la’o hela,” Komisáriu Ezekutivu Servisu Korporativu, EDTL, E.P, Júlio de Jesus Gonçaves, informa ba Agência Tatoli, iha niania knaar fatin, Caicoli kinta ne’e.
Notísia relevante : EDTL troka ona transformadór eletríku iha Fatuisin
Daudaun ne’e iha aldeia 310 ho suku neen mak seidauk enerjia eletrisidade. Suku sira ne’ebé seidauk asesu ahi eletrisidade mak hanesan suku Petulau, postu administrativu Remexiu (Aileu) daudaun halo re-konkursu projetu, suku Makadade (Ataúro), suku Fahilebu (Liquiçá), suku Urahou no Manusae (Ermera), no ikus liu suku Goulolo (Bobonaro), ne’ebé fatin hirak ne’e instalasaun sei la’o hela.
Aldeia sira ne’ebé seidauk asesu maka hanesan 120 daudaun ne’e dezeñu no Bill of Quantity (BoQ) finaliza ona no hein publika sai, aldeia 76 dezeñu la’o hela, aldeia 79 seidauk halo levantamentu, no aldeia 35 prosesu konstrusaun la’o hela.
Iha parte seluk, EDTL, E.P monta ona kontadór pre-pagu 103.648, kompostu hosi monofáziku 102.269, trifáziku normál 1.307, AMC DC unidade 32, AMR CT unidade 27 no panel AMR unidade 13.
Jornalista : Antónia Gusmão
Editora : Julia Chatarina
