LIQUIÇÁ, 01 fevereiru 2024 (TATOLI)—Governu liuhosi Ministru Komérsiu no Indústria, Filipus Nino Pereira, husu ba retallista (loja no kios) sira ne’ebé sosa foos subsídiu hosi empreza fornesedór sira hodi fa’an tutan, atu labele halo manipulasaun presu.
“Hafoin lansa foos subsídiu Golden Star iha fulan kotuk, ita halo monitorizasaun ba munisípiu sira no deteta iha fa’an-na’in balun halo manipulasaun ba folin foos ne’ebé Governu deside, nune’e husu ba fa’an-na’in sira keta halo manipulasaun ba folin foos,” Ministru hateten iha Portu Tibar, kinta ne’e.
Governu antes ne’e kontrata empreza importadora hodi fa’an foos subsídiu ho folin ne’ebé deside ona.
Notísia relevante : Hahú ohin, Alfa Dili fa’an foos subsídiu ‘Golden Star’
Folin foos subsídiu fa’an iha Dili no munisípiu sira mak hanesan iha armazein Alfa Dili saka ida kilograma 25 ho folin $11,50, retallista sosa no fa’an iha Dili kilograma 25 ho folin $12,50 kada saka, ba Ermera, Aileu, Liquiçá, Baucau, Manatuto fa’an kilograma 25 ho folin $13, ba Bobonaro, Ainaro kilograma 25 ho folin $14, Lautém, Manufahi, no Viqueque kilograma 25 ho folin $14 no Rejiaun Administrativa Espesiál Oé-cusse Ambeno (RAEOA), Ataúro fa’an kada saka kilograma 25 ho folin $14,50.
“Haree presu ne’ebé ita tau ona mak sira kontra maka sei iha sansaun, hosi sansaun ne’e iha mós administrasaun no taka sira-nia empreza tanba kontra dekretu-lei 29/2011 kona-ba presu justu,” Governnate fó hanoin.
Daudaun ne’e, Ministériu Komérsiu no Indústria (MKI) liuhosi Diresaun Regulasaun Komersiál Protesaun Konsumidór serbisu hamutuk ho Autoridade Inspesaun Atividade Sanitária no Alimentár, Institutu Públiku (AIFAESA, I.P) hodi halo fikalizasaun, maski parte rua ne’e hasoru difikuldade falta rekursu umanu no transporte.
“Ita espera munisípiu sira iha hotu autoridade nune’e bele koopera malu ho retallista sira ne’ebé fa’an foos hodi tulun komunidade ne’ebé iha kapasidade kompra kiik, tanba ita halo manipulasaun ida-ne’e bele prejudika konsumidór no halakon konfiansa ba emprezáriu rai-laran,” nia hateten.
Iha fatin hanesan, Inspetór Jerál AIFAESA, I.P, Ernesto Monteiro, hateten, hafoin empreza lansa foos subsídiu iha fulan kotuk to’o agora, sira-nia parte seidauk simu keixa hosi konsumidór relasiona ho kualidade foos Golden Star.
“Ita seidauk simu keixa ruma, nune’e husu ba konsumidór sira kona-ba foos a’at ka la kualidade, tanba foos sira ne’e antes tama mai halo ona teste, nune’e konfirmadu loos ona mak haruka mai,” nia dehan.
Jornalista : Arminda Fonseca
Editora : Julia Chatarina
