DILI, 01 fevereiru 2024 (TATOLI)-Komisaun D trata asuntu Ekonómia no Dezenvolvimentu iha Parlamentu Nasionál (PN), kinta ne’e, hala’o audénsia ho Ministru Komérsiu no Indústria (MKI), Filipus Nino Pereira.
Iha enkontru ne’e, diskute kona-ba planu lejislasaun no bele hetan aprovasaun hosi órgaun lejislativa hanesan Lei Kódigu Propriedade Industriál ho lejislasaun sira seluk tan.
“Ohin, Ministériu Komérsiu Indústria mai iha Parlamentu Nasionál ho komisaun D partilla informasaun ba projetu-lei balun ne’ebé tenke aselera iha tinan ne’e. MKI haree iha nesesidade duni atu aprezenta proposta-lei liuliu hafoin Timor-Leste nia adezaun ba Organizasaun Mundiál Komérsiu (OMK). Lejislasaun balun presiza lori mai PN atu hetan aprovasaun, Nesesidade ne’ebé agora ita iha mak Lei Kódiku Propriedade Industriál importante tebes atu define ita-nia dezenvolvimentu indústria ne’ebé ita presiza duni iha lei ida, hodi bele fó protesaun ba ita-nia indústria ne’ebé mak iha,” Ministru Filipus Nino Pereira hateten ba jornalista sira hafoin ramata halo audiénsia iha sala GMPTL, PN.
Kona-ba Lei Kódiku Propriedade Industriál ne’e, MKI prepara tiha ona hein mai aprezenta, ne’ebé planu iha trimestre dahuluk tinan ne’e tanba sensibilizasaun internál hala’o tiha ona, nune’e sei lori proposta-lei ne’e mai iha PN atu halo diskusaun no aprovasaun.
Aleinde ne’e, MKI mós aprezenta projetu-lei balun presiza hetan aprovasaun hosi Parlamentu Nasionál inklui ba iha Konsellu Ministru (KM).
Durante audiénsia, Ministru Komérsiu no Indústria (MKI), Filipus Nino Pereira. aprezenta mós programa importante rua hosi MKI hanesan komérsiu no indústria, kona-ba polítika oinsá bele hala’o dezenvolvimentu komérsiu liuliu TL nia preparasaun ba adezaun ba ASEAN ho OMK ninian, presiza rekursu umanu ne’ebé di’ak tanba ne’e polítika MKI aposta ba kapasitasaun.
No aprezenta mós infraestrutura balun presiza haree hahú estudu viabilidade ba armazen tránzitu hanoin atu estabelese iha fronteira, no dezenvolvimentu indústria nia estabelesimentu ba parke industriál no revitalizasaun merkadu atu garante atividade komersiál ne’ebé la’o ho seguru.
Sei haree mós oinsá empodera ita-nia joven emprendedór sira tanba ko’alia kona-ba diversifikasaun ekonómika ne’e presiza identifika produtu pontesiál ne’ebé iha, ida-ne’e mak presiza promove no promosaun produtu sira tama iha merkadu nasionál hodi halo exportasaun ba merkadu internasionál.
“Ne’ebé, haree oinsá sinérjia MKI ho setór privadu sira-ne’e atu bele promove di’ak liután ita-nia empreza mikro no media sira, hodi hamutuk ho ministériu ba polítika boot liu dinamizasaun atividade ekonómiku lihosi diversifikasaun ekonómika no mós kriasaun kampu traballu,” nia hateten.
Governante ne’e apresia ba hanoin hosi Deputadu sira-ne’ebé kontribui tebes ba polítika IX Governu Konstitusionál nian iha parte dezenvolvimentu ekonómiku durante mandatu, nune’e MKI presiza duni koordenasaun no hanoin ne’ebé mai hosi PN ho komisaun D nian.
Prezidente Komisaun D, Deputadu Ricardo Baptista, hateten ohin komisaun bolu hala’o audiénsia ho Ministru Komérsiu no Indústria, ho objetivu ko’alia planu lejislasaun saida mak atu sira halo iha tinan ida-ne’e iha trismetre dahuluk no daruak nian.
Jornalista : Nelson de Sousa
Editór : Cancio Ximenes
