iklan

COVALIMA

Família 50-resin iha bairru Tali-oan asesu fali ona bee-moos

Família 50-resin iha bairru Tali-oan asesu fali ona bee-moos

Koordenadór BTL, E.P Covalima. Imajen Tatoli/Celestina Teles.

COVALIMA, 02 fevereiru 2024 (TATOLI) – Família 50-resin ne’ebé hela iha bairru Tali-oan, iha suku Debos, Suai, asesu fali ona bee-moos hafoin semana ida falta tanba kauza husi kanu ne’ebé intupidu.

Koordenadór BTL, E.P, Castro Dody Ramos, hatete tékniku Bee Timor-Leste, Empreza Públika (BTL,E.P) Covalima hadi’a kanu bee refere hafoin simu keixa husi kliente sira ne’ebé hela iha iha bairru ne’e. Tékniku nia serbisu mak bainhira simu keixa husi komunidade tenke konsidera sira-nian preokupasaun,entaun hadia kedas kanu bee-moos ne’ebé mak intupidu.

“Hafoin simu keixa, ami mai iha terrenu hodi hadi’a kedas kanu bee-moos ne’ebé intupidu, nune’e komunidade sira asesu bee-moos ho normál ”, Castro Dody Ramos dehan, ohin.

Kliente Cornélio do Carmo,  hatete bainhira bee lasai tenke hato’o keixa iha edifísiu BTL.E,P  Covalima nune’e tékniku sira bele hadia. “Ami la asesu bee-moos semana ida ona, entaun hato’o  keixa. Ohin, tékniku BTL,E.P hadi’a kanu ne’ebé intupidu ne’ebé halo ami la asesu bee-moos ho di’ak” , realsa.

Bazeia ba dadus 2023, tékniku BTL instala ona kontadór iha área urbana iha zona haat iha área urbana postu Suai hamutuk 333 ho totál kliente 1.251.

Maske nune’e, BTL rekoñese katak depois instalasaun kontadór kliénte sira ladún asesu bee-moos di’ak, tanba ne’e presiza halo identifikasaun tanba presaun bee-moos mak ladún di’ak.

Notísia relevante: BTL Covalima arrekada reseita $24.270

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!