Komisaun A husu entidade relevante implementa lei Organizasaun Judisiária

DILI, 02 fevereiru 2024 (TATOLI)—Prezidente Komisaun A trata asuntu Justisa no Konstituisionál iha Parlamentu Nasionál (PN), Deputadu Patrocínio Fernandes, husu ba entidade relevante atu aselera implementasaun lei Organizasaun Judisiáriu.
Notísia Relevante: PN aprova alterasaun lei Organizasaun Judisiária iha finál globál
“Agora lei ne’e entrada em vigór, entidade sira-ne’ebé iha responsável iha lei ne’e haruka atu implementa,” Prezidente Komisaun A ne’e hateten ba Agência Tatoli iha uma fukun PN, sesta ne’e.
PN nafatin asume papél ida fiskalizadór akomapña hodi haree, tanba ne’e iha PN liuhosi Deputadu sira dalaruma iha segunda no tersa (reuniaun plenária) sempre hateten reforma judisiária.
Reforma sira-ne’e inklui parte balun lei Organizasaun Judisiária, hosi ne’eba mak atu halo reforma judisiária sira-ne’e kaer ba regra no funsaun sira-ne’ebé hatuur tiha ona.
Agora, ba entidade sira-ne’ebé lei atribui responsabilidade buka atu implementa lei tuir espetativa ne’ebé Estadu iha.
“Iha lei ne’e define ona estabelese Tribunál primeira instánsia iha munisípiu hotu-hotu. Sei iha mós posibilidade atu bele estabelese Tribunál instánsia daruak ida ka rua, komforme tuir lei kobre ba rejime ne’ebé iha inklui estabelese Tribunál Supremu Justisa,” nia hateten.
Membru hosi órgaun lejislativa ne’e fiar katak, entidade relevante sira bele tau prioridade implementa lei Organizasaun Judisiáriu iha tinan ne’e, no hanoin ida-ne’e bele fó asesu justisa di’ak liután ba povu.
Antes ne’e, Jurista Sergio Quintas, husu ba Governu atu aselera implementasaun lei organizasaun judisiária iha 2024.
Lei organizasaun judisiária ne’ebé entra vigór ona iha 2022, tuir loloos implementa ona iha 2023, maibé sei hein tanba Governu haree kondisaun balun lei ne’e molok ba ninia implementasaun.
Tanba ne’e, nia husu atu hakarak ka lakohi iha 2024, Governu tenke tau prioridade hodi aselera ninia implementasaun, tanba lei ne’e di’ak no bele lori justisa besik liu ba povu no povu bele sente asesesu ba justisa to’o iha área remota.
“Tuir ha’u-nia koñesimentu katak implementasaun ba lei organizasaun judisiária ne’e nesesáriu ona, só nia implementasaun de’it. Tanba ne’e, iha 2024, Governu tenke tau prioridade atu implementa lei ne’e,” nia hateten.
Provizoriamente Tribunál Judisiál Primeira Instánsia sei haat (4), maibé kuandu Governu implementa ona lei organizasaun judisiária mak sei estabelese Tribunál iha munisípiu hotu, sei estabelese mós Supremu Tribunal Justisa, Tribunál Administraitiva Fiskál no Konta, Tribunál por menór no Tribunál Militár.
Nia esplika, iha lei organizasaun judisiária mós define klafikasaun ba Juiz sira liuliu atendimentu ba kazu sira hanesan Juiz ne’ebé tutela ba krime ne’e sei kaer kazu krime no ida ka’er kazu sivil ne’e nia kaer kazu sivíl ne’ebé iha espesifikasaun ne’e klaru ona.
“Ha’u hanoin ita hahú ona konsolida iha rekursu umanu iha setór justisa, tanba kandidatu Juiz sira hamutuk 50 ne’ebé tinan kotuk tuir formasaun iha Sentru Formasaun Jurídiku Judisiária ne’e konklui ona sira-nia teória no agora sira halo ona estajiu ba Tribunál sira,” nia dehan.
Lei organiazaun judisiária ne’e la implementa ho didiak, impaktu ba setór justisa liuliu ba povu iha área remota sira tenke selu osan ba karreta hodi mai tuir julgamentu, sira tenke la’o dook ne’e ladún efisiénte no efikasia.
Nia husu Governu atu rezolve fazeadamente hodi kria kondisaun ba implementasaun lei organizasaun judisiária.
“Se bele karik Governu rezolve fazeadamente hodi kria kondisaun ba implementasaun lei organizasaun judisiária. Se ita la implementa lei organizasaun judisiária ne’e mak ita-nia setór justisa sei la efetivu ho másimu,” nia hateten.
Notísia Relevante: Jurista Quintas husu Governu aselera implementa lei organizasaun judisiária
Jornalista : Nelson de Sousa
Editór : Cancio Ximenes

