DILI, 05 janeiru 2024 (TATOLI) – Autoridade Protesaun Sivíl (APC, sigla portugés) relata katak, entre 30 janeiru no 05 fevereiru, uma hamutuk 130 maka afetada ba dezastre naturál kauza husi anin sobu uma hamutuk 119, rai halai danifika (estraga) uma lima no ahi han neen.
Xefe Gabinete Relasaun Esterna APC, Cesário da Silva Marques, hatete dadus dezastre naturál ne’e akontese iha territóriu no vítima sira ne’e kuaze hetan ona apoiu emerjénsia.
Munisípiu sira ne’ebé afetadu ba dezastre mak Aileu anin sobu uma haat, Ainaro 28 no ahi han uma ida, Baucau anin sobu uma ida, Bobonaro 33 no rai halai danifika uma tolu no ahi han uma rua. Iha Covalima anin sobu uma rua no ahi han ida, Ermera anin sobu uma 31, rai halai danifika uma ida no ahi han ida, Lautém anin sobu uma ida, Liquica uma 14, Manufahi ida, Oé-Cusse ida, Viqueque 13 no ahi han uma ida.
Husi akontesementu sira ne’e, ekipa Servisu Protesaun Sivíl iha munisípiu fó ona asisténsia emerjénsia ba família vitíma sira mak hanesan foos, mina, masin, inklui nesesidade uma-laran nian.
“Ami bele apoii de’it maka ai-han emerjénsia ba vitima sira. Agora, kona-ba asuntu atu hetan apoiu materiál emerjénsia ne’e la’ós ami-nian kompeténsia”, dehan.
Lembra katak, APC relata antes ona, entre loron 09 no 15 janeiru, uma 49 mak hetan estragu no ema na’in-haat lakon sira-nia vida.
Uma 49 ne’ebé danifika ne’e kompostu husi anin sobu uma 36, ahi han ualu no impaktu husi rai-halai iha uma lima. Aleinde ne’e, rejista ema na’in-haat mak lakon vida – ida mai husi Viqueque no tolu husi Liquiçá.
Notísia relevante: APC rejista uma 49 hetan estragu no ema na’in-haat lakon vida
Jornalista: Tomé Amado
Editora: Maria Auxiliadora
