VIQUEQUE, 05 fevereiru 2024 (TATOLI)- Responsavél empreza Don Boaventura Unipesoál, Lda, Victor Mintura, informa, hahú halo normalizasuan liuhosi aterru rai ba dalan Lugatoi hodi fasilita movimentasaun ema no transporte públiku iha suku Caraubalu, postu Viqueque Vila, munisípiu Viqueque.
“Ami halo ona atividade kulturál hodi simu matak malirin iha semana kotuk, nune’e daudaun ami halo normalizasaun ba dalan Lugatoi liuhosi aterru rai ho di’ak atu rai la bele hala’i tun tan fali bá mota hodi fasilita movimentu ema no transporte”, Resposavél empreza ne’e, hatete ba Agência TATOLI, I.P, iha postu Viqueque vila, segunda ne’e.
Daudaun ne’e, nia dehan empreza mós destaka nia-ekipamentu pezadu permanete iha diresaun Lugatoi nia atubele responde emerjénsia bainhira rai monu.
Ba atividade ne’e, nia afirma tanba hetan ajudikasaun direta husi Ministériu Obra Públiku (MOP) hodi halo normalizasaun emerjénsia ba estrada Lugatoi.
Maibé, nia dehan ba servisu reabilitasaun estrada refere seidauk bele halo tanba hein hela dezeñu no Bill of Quantity (BoQ) ne’ebé daudaun ne’e preapra hosi Ministériu Obra Públiku.
“Governu fó ona fiar ba ami, ami sei kolabora ho Governu hodi normaliza no hadi’a dalan ne’e”, nia afirma.
Iha fatin seluk, Xefe Suku Caraubalo, João Pinto, informa, Governu liuhosi MOP ajudika direta ba empreza Don Boaventura hodi hadi’a dalan Lugatoi atubele fasilita movimentasaun ema no transporte públiku iha Viqueque.
“Ha’u husu komunidade sira labele halo impedementu ruma, tanba ne’e ezijensia hosi povu Viqueque. Karik ema ruma maka impede mak sei hasoru seguransa. Tanba dalan ne’e aat kle’ur ona hodi difikulta movimnetasaun ba abitante sira nia”, nia sujere.
Notísia relevante: MOP ajudika direta Empreza Don Boaventura reabilita estrada Lugatoi ne’ebé kuaze kotu
Jornalista: Vitorino Lopes da Costa
Editór : Florencio Miranda Ximenes
