DILI, 05 fevereiru 2024 (TATOLI)—Membru Parlamentu Nasionál (PN) liuhosi Deputadu bankada CNRT, Saul Salvadór, husu ba parte ezekutivu liuhosi entidade tutela atu buka solusaun lalais rezolve rekursu umanu iha Autoridade Inspesaun Fiskalizasaun Atividade Ekómika no Sanitária Alimentár, Institutu Públiku (AIFAESA, I.P) hodi bele garante nafatin inspesaun iha terrenu.
Notísia Relevante: AIFAESA, I.P tinan ne’e sei rekruta funsionáriu tékniku
“Kona-ba menus rekursu umanu hanoin ne’e loos duni, agora dadaun ne’e AIFAESA hasoru problema atu hala’o kontrolu ne’e menus duni nia funsionáriu, hodi nune’e difikulta sira atu halo inspesaun ka kontrolu iha atividade ekonómiku sira-ne’e sempre hetan difikuldade. Entaun, hanoin Governu oinsá mak atu haree asuntu rekursu umanu,” Deputadu CNRT ne’e hateten ba Agência Tatoli, segunda ne’e.
Nia dehan, haree ba estabelesimentu AIFAESA ne’e kria ho nia papél atu kontrolu no inspeksaun ativididade ekonómiku sanitária no alimentár, nune’e haree ba serbisu AIFAESA menus rekursu hanoin Governu presiza buka solusaun rezolve lalais iha tempu badak hodi aumenta rekursu pesoál sira-ne’ebé kualidade hodi hala’o kna’ar AIFAESA nian.
Aleinde haree Governu mós presiza haree fasilidade hodi nune’e AIFAESA bele hala’o nia kna’ar di’ak liután hodi kontrolu kualidade sasán.
Deputadu hosi bankada Governu ne’e mós, sujere ba AIFAESA bele hala’o nia atividade fulan tolu ka neen hala’o inspesaun regulár ba estabelesimentu komersiál sira iha rai-laran, no AIFAESA mós tenke loke-aan ona to’o nível munisípiu sira tanba daudaun kobertura iha de’it Dili.
Deputadu FRETILIN, Antoninho Sarmento Doutel, hateten serbisu sira AIFAESA ne’e esensiál tebes, entaun saida mak AIFAESA tenke halo mak atu tau ema ho kapasidade tékniku sira hodi bele halo kontrolu di’ak iha estabelesimentu komersiál sira.
Deputadu KHUNTO, Luis Roberto, hakarak husu esklaresimentu razaun saida hosi parte ezekutivu liuhosi ministériu tutela hapara kontratu funsionáriu AIFAESA, I.P na’in 160, tanba tuir informasaun katak mezmu sira-nia kontratu termina iha 2027 maibé foin bolu fali ema na’in-64 hodi kontinua fila-fali serbisu no restu laiha, mezmu sira-nia natureza kontratu hanesan de’it.
Vise Ministru ba asuntu Parlamentár, Adérito Hugo da Costa, responde kfunsionáriu kontratadu no kazuál sira hapara tanba kontratu anuál 31 dezembru hapara liuhusi eskrita ou la eskrita mós para, tanba kontratu hatete de’it 31 dezembru termina.
Maibé, nai dehan, Vise Primeiru Ministru asuntu Ekonómiku no Ministru Koordenadór asuntu Ekómiku (MKAE) hasai karta antes 15 dezembru 2023 antesipadamente tuir regra ne’ebé iha tenke konsidera mak hapara kontratadu no kazuál sira ne’e husu atu hapara.
Hafoin hapara, ministériu halo avaliasaun katak serbisu ne’ebé iha nesesita atu renova kontratu ba balun de’it la’ós hotu, tan ne’e mak bolu de’it balun ne’ebé sira-ne’e tenke mai duni bele kontinua fali serbisu. Tanba, fatin no espasu iha serbisu iha atu halo, tanba balun fatin no serbisu mós laiha maibé kontratu iha antes ne’e.
Nune’e iha loron 120, Governu liuhosi ministeriu tutela halo avaliasaun sériu ba buat sira-ne’e hotu hodi haree ba ezisténsia I.P no númeru forsa traballu ne’ebé loloos ba volume serbisu iha I.P sira-ne’e, ne’ebé mak razoavel liu bele simu. Tanba, I.P lubun ida sira barak aluga hela uma kompañia sira-nia kontainer ho selu osan boot maibé rekruta ema mós la rezerva, espasu kiik rekruta ema barak.
Nune’e. ministériu tutela sira haree situasaun ida-ne’e, la’ós taka I.P sira maibé hapara liuliu funsionáriu sira-ne’ebé kontratadu ba tinan ida de’it no kazuál, hapara hodi buka haree solusaun númeru funsionáriu iha I.P sira-ne’e loloos mak hira.
Jornalista : Nelson de Sousa
Editór : Cancio Ximenes
