DILI, 05 fevereiru 2024 (TATOLI)–Ministériu Solidariedade Sosiál no Inkluzaun (MSSI) hamutuk ho ninia parseiru hanesan Parseiru ba Dezenvolvimentu Umanu (PHD, sigla inglés) ho Catalpa Internasionál, segunda ne’e, realiza serimónia hand over ba tékniku ligadu ho dokumentu ba implementasaun programa Bolsa da Mãe Jerasaun Foun (BdM-JF).
Atividade ne’e transferénsia ekipamentu operasionál nu’udar apoiu ne’ebé parseiru oferese ona ba MSSI liuhosi Diresaun Jerál Protesaun Sosiál iha tinan 2022 to’o 2023.
“Prosesu hand over tékniku dokementu ligadu ba programa Bolsa da Mãe Jerasaun Foun no ekipamentu operasionál ne’e akontese tanba programa ne’e la kontinua implementa iha tinan ne’e, ninia razaun maka bazeia ba revogasaun dekretu-lei númeru 22/2021, loron 10 novembru ne’ebé kria programa Bolsa da Mãe Jerasaun Foun, hosi Konsellu Ministru iha loron 6 dezembru 2023,” Ministra Solidaridade Sosiál, Verónica das Dores, hateten iha salaun MSSI, Caicoli, segunda ne’e.
Biban ne’e, MSSI liuhosi Diresaun Nasionál Asisténsia Sosiál (DNAS) agradese no apresia ba PHD Catalpa Internasionál no Ajénsia Mosan no T-Pay, ne’ebé apoiu serbisu diresaun durante implementa programa iha munisípiu hitu hanesan Ainaro, Bobonaro, Viqueque, Manatuto, Covalima no Liquiçá inklui Rejiaun Administrativa Espesiál Oé-cusse Ambeno (RAEOA).
“Ha’u hakarak hato’o agradesimentu ba parte hotu ne’ebé kontribui direta no indireta, liu-liu ba Governu Austrália liuhosi PHD ho Catalpa Internasionál ne’ebé durante ne’e apoiu MSSI liuhosi programa Bolsa da Mãe Jerasaun Foun. Agora programa ida-ne’e mak laiha ona maibé Governu nia programa barak sei presiza ita atu kontinua serbisu hamutuk,” nia akresenta.
Notísia relevante : Kaleidoskópiu 2023: Revoga “Bolsa da Mãe Jerasaun Foun”, mantein “Bolsa da Mãe Kondisionál”
Iha fatin hanesan, Team Leader PHD, Melinda Mausaco, hateten, prinsípiu xave parseria serbisu entre PHD no MSSI maka tuir polítika, planu no apoiu MSSI. Kolaborasaun ne’e hodi hametin sistema MSSI hodi bele presta serbisu inklusivu ho kualidade di’ak iha área protesaun sosiál no inkluzaun defisiénsia
“Hanesan ita hatene, PHD hahú serbisu hamutuk ho MSSI iha tinan-hitu liubá. Hahú ho paizajen luan iha área protesaun sosiál no inkluzaun defisiénsia. Haksolok tebes tanba hosi serbisu hamutuk ne’e konsege hamosu buat barak hanesan prosesu sertifikasaun médiku ba ema ho defisiénsia ba programa SAll, responde ba situasuan COVID-19 ho pagamentu uma-kain iha territóriu tomak, hamutuk halo avaliasaun ba programa Bolsa da Mãe no hamosu opsaun ba reforma hodi bele simplifika prosesu administrasaun no hamutuk dezeña MSSI nia planu estratejia 2021-2025,” nia relata.
Aleinde ne’e, dezeña no implementa BdM-JF iha munisipiu hitu revee finaliza no apoiu implementasaun Planu Asaun Nasionál ba ema ho defisiénsia hodi apoiu prosesu atu estabelesimentu Konsellu Nasional ba Ema ho defisiensia – esbosu dekretu lei preparadu.
Nune’e, iha tinan-tolu liubá hafoin Konsellu Ministru deside atu hadi’a liután impaktu investimentu ba labarik sira liuhosi protesaun sosiál, PHD serbisu hamutuk ho MSSI no Ministeriu Saude hodi dezeña no implementa BdM-JF. Programa ne’e dezeña intensionalmente hodi simplifka sistema administrasaun ba benefisiáriu sira hodi bele asesu fasil liután asisténsia sosiál.
“Daudaun programa Bolsa da Mãe Jerasaun Foun ramata ona maibé serbisu hamutuk durante ne’e, ita prepara dokumentu lubuk ida oinsá atu fasilita MSSI hanoin ida-ne’e ami prepara pakote dokumentasaun hosi ita-nia serbisu hamutuk entrega no hein katak MSSI sei utiliza nu’udar referénsia ba serbisu sira oin mai,” nia tenik.
Dokumentasaun ne’ebé PHD entrega ne’e organiza ona ho didi’ak iha pakote komprensivu tolu, ne’ebé ida-idak dezeñadu atu fornese koñesimentu detalladu kona-ba aspetu oin-oin hosi durante serbisu no kolaborasaun hamutuk.
PHD mos entrega fasilidade sira ne’ebe durante ne’e disponibiliza hosi Governo Austrália hodi fasilita serbisu hamutuk entre ekipa PHD no MSSI. Lista asset ne’e ho valór milllaun $1,4 inklui sistema MIS BdM-JF.
Semana oin ekipa Catalpa sei finaliza prosesu hand over ba sistema MIS ho ekipa téknika.
Kona-ba ekipamentu operasionál no materiál sira seluk hanesan laptop, komputador, tablet, no motorizada sei organiza tuir mai no DFAT mak sei entrega ba MSSI.
Jornalista : Arminda Fonseca
Editora : Julia Chatarina
