iklan

POLÍTIKA

Kaleidoskópiu 2023: Revoga “Bolsa da Mãe Jerasaun Foun”, mantein “Bolsa da Mãe Kondisionál”

Kaleidoskópiu 2023:  Revoga “Bolsa da Mãe Jerasaun Foun”, mantein “Bolsa da Mãe Kondisionál”

Ministra Solidariedade Sosial no Inkluzaun, Verónica das Dores Konferensia imprensa kona-ba bolsa da mae kondisional iha tinan 2023. edifísiu MSSI Caicoli, segunda (16/11). Imajen Tatoli/Egas Cristovão.

DILI, 29 dezembru 2023 (TATOLI)—Programa Bolsa da Mãe Jerasaun Foun dezempeña papél importante ida hanesan projetu-pilotu, tanba fó kontribuisaun ne’ebé boot hodi kombate moris-ki’ak iha Timor-Leste.

Ministériu Solidariedade Sosiál no Inkluzaun (MSSI) iha responsabilidade tomak hodi halo konseitu no hala’o polítika nasionál dezenvolvimentu sosiál, tanba Governu presiza dezenvolve persesaun ida-ne’ebé klara liu kona-ba relasaun entre kapasidade Estadu, konjuntura nasionál no realizasaun inisiativa sustentável sira ho efeitu ba médiu no longu prazu.

Benefisiáriu programa Bolsa da Mãe Jerasaun Foun iha postu saúde Afaloikai, kinta (07/09/2023). Imajen Tatoli/Vitorino Lopes da Costa.

Movimentu estratéjiku ida-ne-e iha nia objetivu, bazeia ba análize esperiénsia ne’ebé liu ona hosi kedas tinan 2012 (ne’ebé regula liuhosi Dekretu-Lei nú. 18/2012, loron 4 fulan-abril, no hafoin hosi tinan 2021 (regula hosi Dekretu-Lei nú. 22/2021, loron 10 fulan-novembru, atu garante katak ita bele amplifika no fortalese impaktu sosiál, tuir kapasidade orsamentál ne’ebé reál ho foku iha públiku no iha liña atuasaun espesífiku sira.

Governu iha responsabilidade hodi hadi’a no implementa estratéjia olístika no abranjente ne’ebé sei rezolve dezafiu oioin kona-ba moris-ki’ak no subnutrisaun ho efikás liuhosi pakote intervensaun integradu ida-ne’ebé lidera no orienta ho forma nasionál.

Governu revoga programa “Bolsa da Mãe Jerasaun Foun”

Iha 06 dezembru 2023, Governu liuhosi reuniaun ordinária Konsellu Ministru, kuarta ne’e aprova projetu Dekretu-Lei, ne’ebé aprezenta hosi Ministra Solidariedade Sosiál no Inkluzaun, Verónica das dores, ba revogasaun Dekretu-Lei númeru 22/2022, 10 novembru, ne’ebé kria subsídiu ba inan isin-rua no ba labarik sira, ne’ebé hanaran ‘bolsa da mãe jerasaun foun’.
Revogasaun programa bolsa da mãe jerasaun foun ne’ebé estabelese hosi Dekretu-Lei númeru 22/2021, loron 10 novembru, sai hanesan baze ba avaliasaun krítika ida hosi polítika asisténsia sosiál ne’ebé iha vigór.

Justifikasaun hodi revoga Programa Bolsa da Mãe Jerasaun Foun no altera Dekretu-Lei nú. 18/2012, loron 4 fulan-abríl, bazeia ba fatór jerál 10:

  1. Otimizasaun rekursu eskasu: Tenke dirije rekursu ba labarik sira, ho valór atualizadu, la’ós mantein valór ne’ebé hanesan, ne’ebé prevee iha tinan 2012 no iha tempu hanesan, habelar benefisiáriu públiku, inklui inan isin-rua sira.
  1. Konsisténsia kona-ba polítikas no persesaun públika: Konsentra benefísiu ba labarik sai kompativel liu ho koerénsia entre programa sosiál oioin ne’ebé, maiória, diresionadu no kondisionál.
  1. Aumenta impaktu nutrisionál: Lahó aumentu iha valór subsídiu, família sei la bele sosa ai-han sira-ne’ebé iha duni nutrisaun.
  2. Kria kondisaun ba abordajen ida ne’ebé abranjente: presiza atu intensifika benefísiu subsidiáriu ba labarik sira, no temátika adisionál sira seluk karik bele inkorpora iha tempu badak.
  1. Kombate fragmentasaun programa konsolidadu hosi Dekretu-Lei tinan 2012 nian hanesan temi ona iha leten: Forma oinsá fó subsídiu ne’ebé prevee ona iha tinan 2012 no, hafoin iha tinan 2021, iha prátika programa rua ne’ebé koeziste, sein iha relasaun ida entre programa rua ne’e: programa ida ba labarik no programa ida seluk ba inan isin-rua. La kria previzaun legál ida atu klarifika katak ho inkluzaun inan isin-rua sira, sei reforsa apoiu públiku nian ba labarik sira.
  2. Fortalese programa orijinál hodi habelar ninia impaktu sai rezultadu ne’ebé konkretu: Governu hakarak reforsa programa inisiál Bolsa da Mãe, ho inklui nafatin labarik sira ho tinan neen mai kraik, hodi masimiza impaktu no retornu investimentu ho foku iha dezenvolvimentu kapitál umanu no kreximentu ekonómiku inkluzivu.
  1. Perspetiva reforsu kapasidade no apropriasaun governamentál: Importante tebes atu dezenvolve kapasidade interna no apropriasaun programa prinsipál sira hodi redús dependénsia finansiamentu no apoiu esternu, nune’e hodi reforsa sustentabilidade iha tempu naruk ba sistema nasionál protesaun sosiál nian.
  2. Abordajen ne’ebé responsiva no espesífika tuir kontestu: Governu tenke adapta ba mudansa nesesidade populasaun nian ho abordajen ida-ne’ebé espesífika tuir kontestu nasionál, hodi evita dependénsia ba modelu esternu no ajenda parseiru nian.
  3. Jestaun dadus no privasidade: Kumpre responsabilidade sira-ne’ebé prevee ona iha lejizlasaun kona-ba dadus no privasidade ezije kontrolu hosi Governu kona-ba dadus no informasaun hosi sistema dadus.
  1. Perspetiva hodi reforsa viabilidade pagamentu iha Sentru Saúde sira: Importante tebes atu garante viabilidade pagamentu transferénsia nian iha sentru saúde sira ba kredibilidade programa hosi sidadaun sira. Mekanizmu sólidu sira tenke apoia objetivu ida-ne’e hodi monitoriza no verifikasaun.

Tuir, Diretór Jerál Ministériu Soliriedade Sosiál no Inkluzaun (MSSI), Floréncio Pina Dias Gonjaga, hateten prosesu iha sistema informasaun hosi Dirasaun Nasionál Asisténsia Tékniku iha 12 dezembru 2023 ne’e iha benefisiáriu bolsa da mãe jerasaun foun faze daruak ne’e hamutuk 61,293, no benefisiáriu sira-ne’e tama ona iha sistema maibé sistema akapta de’it aplikante na’in 50.663.

Diretór Jerál MSSI, Florencio Pina Dias Gonzaga.Imajen Tatoli/Egas Cristovão

Pedidu finál ne’e iha loron 12 dezembru, maibé liu ida-ne’e mak foin sira hatama pedidu entaun sistema labele akapta tanba data aplikasaun tarde iha sistema nian, nune’e sira laiha ona direitu maibé sira-ne’e elizivél mós.

Osan ba pagamentu ba fulan dezembru nian hamutuk $9.980,170, pagamentu ne’e hahú ona no sei to’o de’it iha 31 dezembru tinan ne’e, hafoin programa Bolsa da mãe Jerasaun Foun ne’e mós taka ona—maibé osan ne’ebé selu hosi janeiru to’o mai dezembru 2023 ne’e ho totál hamutuk $10.321,565.

Segunda, 30 janeiru 2023: MSSI atualiza dadus benefisáriu “bolsa da mãe jerasaun foun” 15.141—Diretór Jerál Ministériu Solidariedade Sosiál no Inkkuzaun (MSSI), Florêncio Pina Dias Gonjaga, hateten to’o iha loron 28 janeiru tinan ne’e, MSSI atualiza dadus benefisiáriu hamutuk 15.141.

“To’o semana kotuk ne’e ita-nia aplikante ba bolsa da mãe jerasaun foun iha munisípiu Ainaro, Bobonaro no Rejiaun Administrativa Espesiál Oé-Cusse Ambeno (RAEOA) hamutuk 15.141 maibé konta ba benefisiáriu 18.957,” Diretór Jerál Ministériu Solidariedade Sosiál no Inkkuzaun (MSSI) ne’e hateten ba Agência Tatoli, iha nia kna’ar fatin MSSI Caicoli.

Hosi númeru benefisáriu hirak ne’e, benefisiáriu inan isin-rua hamutuk 3.194, labarik ho idade 0-6 hamutuk 15.693 no labarik ho kondisaun defisiénsia hamutuk 70. Benefisiáriu sira iha Ainaro ho Bobonaro ne’e, nia haktuir, ajénsia TPAY Telkomcel mak halo pagamentu no pagamentu ne’e hahú ona iha fulan hirak liubá.

Ba programa Bolsa da Mãe Jerasaun Foun ne’e, Governu aloka osan iha faze dahuluk no daruak nian hamutuk millaun $13.7.

Tersa, 06 juñu 2023: Governu realiza abertura pagamentu “bolsa da mãe jerasaun foun” iha Covalima—Governu liuhosi Ministériu Solidariedade Sosiál no Inkluzasaun (MSSI) hamutuk ho autoridade lokál Covalima, realiza abertura ofisiál pagamentu bolsa da mãe jerasaun foun faze daruak iha munisípiu Covalima.

“Ohin, realiza abertura ofisiál pagamentu bolsa da mãe jerasaun foun ba faze daruak ne’ebé prosesu progamentu hala’o iha sentru saúde Suai, postu administrative Suai, iha munisípiu covalima,” Diretór Jerál Ministériu Solidariedade Sosiál no Inkluzasaun (MSSI), Florêncio Pina Dias Gonzaga, hateten liuhosi diskursu ba abertura ofisiál pagamentu bolsa da mãe jerasaun foun faze daruak, iha sentru saúde Suai.

Programa bolsa da Mãe Jerasaun foun mak programa asisténsia sosiál ne’ebé estabelese ho dekretu-lei númeru 22/2021, 10 novembru, no programa ne’e hahú ona iha munisípiu Ainaro, Bobonaro no RAEOA iha tinan 2022. Ho nune’e, iha tinan 2023, Governu liuhosi MSSI hala’o pagamentu faze daruak iha munisípiu Liquiça, Manatuto, Viqueque no Covalima.

Benefisiáriu 7.875

Entretantu, Diretór Nasionál Asisténsia Sosiál (DNSA), Lucas Tois, hateten iha abertura ba lansamentu ba bolsa da mãe jerasaun foun iha munisípiu Covalima, Manatuto, Liquiça, ho Viqueque ho pagamentu simultanea ba ba benefisiáriu 7.875.

Hosi benefisiáriu 7.875 ne’e, iha munisípiu Covalima iha benefisiáriu programa bolsa da mãe jerasaun foun neé hamutuk 2.076, Liquiça hamurtk 2.449, Manatuto hamutuk 1.494 no Viqueque hamutuk 1.856.

Maibé, totál benefísiariu aprovadu iha 12 abríl 2023 ne’e hamutuk 13.254, no hosi totál ne’e iha benefisiáriu 5.424 mak sei suspende tanba benefisiáriu nia telefone fora da área kobertura.

Tersa, 30 maiu 2023: MSSI rejista ona aplikante “bolsa da mãe jerasaun foun” 43.137—Diretór Jerál Solidariedade Sosiál no Inkkuzaun (MSSI), Florêncio Pina Dias Gonzaga, hateten MSSI rejista ona aplikante ba programa bolsa da mãe jerasaun foun to’o fulan-maiu 2023 ne’e hamutuk ema 43.137.

“Atualizasaun baze dadus rejistu bolsa da mãe jerasaun foun iha munisípiu hitu, to’o segunda (29 maiu 2023) horisehik, ekipa MSSI rejista ona aplikante hamutuk 43.137. Hosi ne’e, inan isin-rua hamutuk 7.280, labarik hosi idade 0-6 hamutuk 35.631 no labarik ho kondisaun defisiénsia hamutuk 166,” Florêncio Pina Dias Gonzaga hateten ba Agência Tatoli, iha nia kna’ar fatin Caicoli.

Hosi númeru ne’e, nia dehan, munisípiu Ainaro aplikante hamutuk 7.424 ho inan isin-rua 1.266, labarik idade 0-6 hamutuk 6.135, labarik kondisaun defisiénsia iha 23, Bobonaro aplikante hamutuk 8.457 ho inan isin-rua 1.646, labarik ho idade 0-6 hamutuk 6.790 no labarik kondisaun labarik 21, RAEOA aplikante hamutuk 8.743 ho inan isin-rua 1.719, labarik ho idade 0-6 hamutuk 6.988 no labarik ho kondisaun defesiénsia 36.

Ba implementasaun faze daruak nian ne’e iha Covalima aplikante 5.239 ho inan isin-rua 842, labarik ho idade 0-6 hamutuk 4.377 no labarik ho kondisaun defisiénsia hamutuk 20, Liquiça aplikante hamutuk 5.647 ho inan isin-rua 817, labarik ho idade 0-6 hamutuk 4.809 no labarik ho kondisaun fíziku 21, Manatuto aplikante hamutuk 3.625 ho inan isin-rua hamutuk 521, labara ho idadeb 0-6 hamutuk 3.082 no labarik ho kondisaun defisiénsia 22 no Viqueque aplikante hamutuk 4.002 ho inan isin-rua hamutuk 479, labarik hop idade 0-6 hamutuk 3.500 no labarik ho kondisaun defisiénsia 23.

Dadus benefisiáriu hosi Ainaro, Bobonaro no RAEOA iha fulan-janeiru to’o fevereiru ne’ebé simu ona subsídiu ne’e hamutuk 22.663 22.663 ho nia osan hamutuk $922.475.

Kinta, 16 novembru 2023: Orsamentu Bolsa da Mãe Jerasaun Foun la prevee iha OJE 2024–Diretór Jerál Ministériu Solidariedade Sosiál no Inkluzaun (MSSI), Florêncio Pina, hateten orsamentu ba programa Bolsa da Mãe Jerasaun Foun (BdMJF) la prevee iha Orsamentu Jerál Estadu (OJE) 2024.

“Ha’u atu informa de’it katak iha Orsamentu Jerál Estadu 2024 MSSI nian la tau ona osan ba bolsa da mãe jerasaun foun. Maibé, ami-nia servisu ba programa bolsa da mãe jerasaun foun kontinua la’o to’o fulan dezembru tinan ne’ e. Ida-ne’e hateten katak prosesu pagamentu la’o hela tanba iha ona nia orsamentu rasik ne’ebé Governu aloka ona,” Florência Pina hateten ba jornalista sira hafoin halo konferénsia imprensa, iha edifísiu MSSI Caicoli.

Nia dehan, programa refere la kontinua mak apoiu hosi Departement of Foreign Affairs and Trade (DFAT) Austrália mós labele kontinua, tanba sira apoiu ba programa ne’e no implementa ho objetivu rua mak mak redús ki’ak, hadi’a má nutrisaun no reforsa ekonómia família nian.

Pagamentu ba aplikante no benefisiáriu kada fulan ba tinan 2023, hosi fulan-janeiru to’o setembru hamutuk 38.202, hosi ne’e totál benefisiáriu ba programa ne’e hamutuk 47.208 no hosi ne’e inan isin-rua iha 4.175, labarik idade 0-6 hamutuk 42.881 no labarik ho defisiénsia iha 151, ne’ebé aloka ona osan $7.240,570 atu selu.

Kinta, 16 novembru 2023: “Pagamentu Bolsa da Mãe Kondisionál sei konklui iha 20 dezembru”—Ministra Solidariedade Sosiál no Inkluzaun (MSSI), Verónica das Dores, hateten Governu liuhosi MSSI sei halo pagamentu ba benefisiáriu bolsa da mãe kondisionál faze daruak iha novembru nia klaran ne’e no sei konklui iha dezembru nia klaran.

Nia hatutan, iha 14 novembru 2023, MSSI foin simu notifikasaun hosi BNCTL nian hodi halo pagamentu ba Bolsa da Mãe kondisionál no mós selu ba idozu no invalidéz sira iha territóriu nasionál.

“Ita-nia alin estudante sira-ne’ebé sai benefisiáriu ba programa bolsa da mãe kondisionál hamutuk 76.094 ho orsamentu $4.565,640. Pagametu hahú iha 15 novembru no sei konklui iha 20 dezembru 2023,” Ministra Verónica hateten ba jornalista sira liuhosi konferénsia imprensa, iha edifísiu MSSI Caicoli, kinta ne’e.

Hosi benefisiáriu 76.094 ne’e kompostu hosi munisípiu Aileu iha benefisiáriu hamutuk 4.453 ho osan $267,180; Ainaro iha 5.483 ho osan $328,980; Baucau iha 6.920 ho osan $415, 200; Bobonaro iha 7.503 ho osan $450,180; Covalima iha 5.419 ho san $325,140; Dili iha 8.946 ho osan $536,760.

Iha Ermera ne’e iha benefisiáriu hamutuk 5.836 ho osan $350,160; Lautém iha 5.664 ho osan $339,840; Liquiça iha 5.346 ho osan $320,760; Manatuto iha 4.302 ho osan $258,120; Manufahi iha 5.333 ho nia $319,980; Oé-Cusse iha 6.076 ho osan $364,560 no munisípiu Viqueque iha 4.813 ho osan $288,780.

Tersa, 21 novembru 2023: MSSI relata razaun esklui programa bolsa da mãe jerasaun foun—Ministra Solidariedade Sosiál no Inkluzaun (MSSI), Verónica das Dores, relata razaun la envolve programa bolsa da mãe jerasaun foun iha Orsamentu Jerál Estadu (OJE) tinan 2024 tanba Governu da-sia iha programa prioridade rasik.

“Ami mai esplika ba Prezidente Repúblika kona-ba programa bolsa da mãe jerasaun foun, ita la envolve iha Orsamentu Jerál Estadu tinan 2024 tanba Governu ida-ne’e iha nia programa rasik tanba iha kampaña polítika partidu CNRT nian katak bainhira manán sei la kontinua programa ida-ne’e, ne’e mak ita la kontinua,” ministra dehan ba jornalista sira iha Palásiu Prezidensiál.

Kinta, 23 novembru 2023: Rede Feto preokupa IX Governu esklui “Bolsa da Mãe Jerasaun Foun”—Rede Feto Timor-Leste preokupa IX Governu Konstitusionál foti desizaun esklui programa Bolsa da Mãe Jerasaun Foun iha proposta Orsamentu Jerál Estadu (OJE) 2024.

“Ami observa hosi espriénsia benefisiáriu sira katak programa ne’e fó vantajen boot ba inan no labarik sira inklui labarik defisiénsia,” Portavós Rede Feto Timor-Leste, Maria José Guterres, hateten iha konferénsia imprensa, iha salaun Rede Feto.

Kuarta, 06 dezembru 2023: Governu revoga programa bolsa da mãe jerasaun foun—Governu liuhosi reuniaun ordinária Konsellu Ministru, kuarta ne’e aprova projetu Dekretu-Lei, ne’ebé aprezenta hosi Ministra Solidariedade Sosiál no Inkluzaun, Verónica das dores, ba revogasaun Dekretu-Lei númeru 22/2022, 10 novembru, ne’ebé kria subsídiu ba inan isin-rua no ba labarik sira, ne’ebé hanaran ‘bolsa da mãe jerasaun foun’.

Revogasaun programa bolsa da mãe jerasaun foun ne’ebé estabelese hosi Dekretu-Lei númeru 22/2021, loron 10 novembru, sai hanesan baze ba avaliasaun krítika ida hosi polítika asisténsia sosiál ne’ebé iha vigór.

“Governu rekoñese importánsia atu proteje labarik ki’ik sira, hanesan konsagra ona iha Konstituisaun Repúblika Demokrátika Timor-Leste, maibé hatene katak importante halo ajustamentu hodi garante distribuisaun ida ne’ebé efikás ba rekursu sira,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.

Segunda, 11 dezembru 2023: FOKUPERS husu MSSI justifika revoga lei kria “Bolsa da Mãe Jerasaun Foun”—Diretora Forum Komunikasaun ba Feto Timor Lororsa’e (FOKUPERS), Maria Fátima Perreira Guterres, husu ba Ministra Solidariedade Sosiál no Inkluzaun (MSSI), Verónica das Dores, presiza justifika razaun konkreta ba revogasaun dekretu-lei 22/2022, 10 novembru, ne’ebé kria subsídiu Bolsa da Mãe Jersaun Foun.

“Atu dehan de’it nune’e bainhira esklui programa ida, mak MSSI tenke justifika razaun ida forte nune’e labele hamosu konfuzaun ba públiku. Razaun saída mak taka tiha programa ne’e. Tanba kestaun mak ne’e, Orsamentu Jerál Estadu, osan povu nian, presiza justifika, Labele dehan, la presiza hatene,” nia hateten ba jornalista sira hafoin halo mídia brrefing kona-bá Orsamentu Senível ba Jéneru (OSJ), iha Palpasu.

Tersa, 12 dezembru 2023: MSSI: Programa foun sei substitui Bolsa da Mãe Jerasaun Foun–Ministra Solidariedade Sosiál no Inkluzaun (MSSI), Verónica das Dores, hateten programa foun sei substitui programa Bolsa da Mãe Jerasaun Foun (BdMJF) maibé la’ós ho osan.

“Bolsa da mãe jerasaun foun ramata maibé Governu kontinua ho bolsa da mãe kondisionál no ita iha programa seluk ne’ebé sei substitui bolsa da mãe jerasaun foun maibé la’ós ho osan. Ita sei kria programa ne’ebé sustentável nune’e tinan rua-tolu mai, ita-nia osan labele hotu lalais tanba ita-nia mina-rai atu besik maran ona,” Ministra Veronica hateten ba jornalista sira, bainhira partisipa iha aprezentasaun lei Orsamentu Jerál Estadu (OJE) 2024 ba membru Parlamentu Nasionál.

Kinta, 14 dezembru 2023: Governu sei selu benefisiáriu Bolsa da Mãe Jerasaun Foun 61.293—Diretór Jerál Ministériu Solidariedade Sosiál no Inkluzaun (MSSI), Florêncio Pina Dias Gonzaga, hateten maske IX Governu Konstitusionál revoga ona programa Bolsa da Mãe Jerasaun Foun maibé ekipa MSSI kontinua halo pagamentu ba benefisiáriu 61.293 iha fulan dezembru ne’e.

Hosi benefisiáriu 61.293 ne’e kompostu hosi tinan 2022 ho 2023 nian, no ba tinan 2022 nian hamutuk 18.018 ho inan isin-rua hamutuk 2.848, labarik iha 15.105, nolabarik ho defisiénsia hamutuk 65.

Benefisáriu ba tinan 2023 nian ne’e hamutuk 43.273, ne’ebé kompostu hosi inan isin-rua iha ema hamutuk 8.971, labarik ho idade 0-6 iha iha ema na’in-34.146 no labarik ho defisiénsia hamutuk ema na’in-156.

Kinta, 14 dezembru 2023: AHDMTL husu Governu labele hapara Programa Bolsa da Mãe Jerasaun Foun—Asosiasaun Halibur Defisiénsia Matan Timor-Leste (AHDMTL), hamutuk ho Provedoria Direitu Umanu no Justisa (PDHJ), husu IX Governu Konstitusionál liuhosi Ministériu Solidariedade Sosiál no Inkluzaun (MSSI) atu kontinua Programa Bolsa da Mãe Jerasaun Foun.

Sesta, 15 dezembru 2023: Aplikante “Bolsa da Mãe Jerasaun Foun” 10.293 sei la hetan subsídiu—Diretór Jerál Ministériu Soliriedade Sosiál no Inkluzaun (MSSI), Floréncio Pina Dias Gonjaga, hateten aplikante ba programa Bolsa da Mãe Jerasaun Foun (BdMJF) hamutuk 10.293 ne’ebé la tama sistema ne’e sei la hetan subsídiu iha dezembru nia rohan.

“Prosesu iha sistema informasaun hosi Dirasaun Nasionál Asisténsia Tékniku iha 12 dezembru 2023 ne’e iha benefisiáriu hamutuk 61,293. Benefisiáriu sira-ne’e tama ona iha sistema maibé sistema akapta de’it aplikante na’in 50.663. Entaun, sira-ne’e mak elizivél ona atu simu subsídiu ne’e, maibé hirak ne’ebé la tama sistema ne’e sei la simu subsídiu,” Diretór Jerál MSSI ne’e hateten ba Agência Tatoli iha nia kna’ar fatin Caicoli.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!