DILI, 06 fevereiru 2024 (TATOLI)—Autoridade Inspesaun Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P) rejista empreza na’in-74 konsege selu ona koima $48.140 ba irregularidade ne’ebé komete iha estabelesimentu komersiál.
Inspetór Jerál AIFAESA, I.P, Ernesto Monteiro, informa, ekipa halo serbisu rutina hanesan halo fiskalizasaun ka kontrolu iha tinan kotuk ba estabelesimentu rejistadu hamutuk 4.197.
“Estabelesimentu 180 komete infrasaun, rejistu prosesu kontrolu 216, no notifikasaun infratór 318, maibé hosi númeru ne’e, prezensa mai ne’e to’o 229 no Inspetór Jerál mak foti desizaun ikus katak prosesu tomak ne’ebé parte jurídiku halo hamutuk 211,” Inspetór Jerál hateten ba Agência Tatoli, iha ninia knaar fatin, Matadoru, tersa ne’e.
Notísia relevante : AIFAESA, I.P tinan ne’e sei rekruta funsionáriu tékniku
Nia dehan, AIFAESA, I.P la’ós atu buka lukru ka ema-nia sala, maibé liuhosi dalan sira ne’e maka operadór atividade ekonómika bele respeita regra sira ne’ebé iha tuir lei haruka no multa bele menus iha futuru.
“Ami mós kontinua nafatin sosializa lei ba operadór ekonómiku sira atu sira hatene kumpre bainhira hala’o atividade,” nia tenik.
Jornalista : Arminda Fonseca
Editora : Julia Chatarina
