COVALIMA, 06 fevereiru 2024 (TATOLI) – Ba implementasaun polítika desentralizasaun administrativa no podér lokál iha munisípiu Covalima maka Vise-Ministru Administrasun Estatál, Jacinto Rigoberto, ohin fó pose ba estrutura autoridade munisípiu refere.
“Ita hahú ona etapa dahuluk ezekusaun polítika desentralizasaun administrativa hodi kompleta estrutura iha munisípiu Covalima”, Jacinto Rigoberto hato’o iha ámbitu tomada pose ba estutura munisipál, ohin.
Nia dehan Governu fó prioridade atu implementa Programa Desentralizasaun Administrasaun ne’ebé konsagra ona iha Konstituisaun hodi halo tranferénsia podér husi administrasaun sentrál ba Governu lokál hodi hakbesik povu atu partisipa iha foti desizaun no envolve iha prosesu dezenvolvimentu Estadu.
Liuhusi implementasaun Programa Desentralizasaun Administrativa ne’e bele tulun dezenvolvimentu setór privadu sira iha área rurál, promove instituisaun sira ba Estadu ho lejítimu iha nasaun hodi loke oportunidade ba partisipasaun demokrátika atu estabelese prestasaun servisu no atendimentu públiku efetivu no efisiente hodi apoia dezenvolvimentu ekonómiku no sosiál.
“Polítika desentralizasaun refere fundamentu no bele responde ba nesesidade espesífika munisípiu ida-idak no komunidade bele asesu servisu públiku hotu depende ita-boot sira ne’ebé asume reponsabilidade ohin simu pose”, governante ne’e fó hanoin.
Autoridade munisipál hanesan pesoál koletiva direitu públiku dotada autonomia administrativa, autonomia finanseira ne’ebé sujeita no tutela ba Ministériu Administrasaun Estatál, regula ho estatutu Autoridade Munisipál no Grupu Tékniku Interministeriál ba Desentralizasaun Administrativa aprova husi Dekretu-Lei númeru 3/2016, 16 marsu, ho redasaun aprovadu husi Dekretu-lei númeru 84/2023, 23 Novembru.
Servisu Autoridade Covalima lidera husi Prezidente Autoridade Covalima no Sekretáriu Munisipál, Diretór Munisipál sira, Administradór Postu Administrativu sira no xefe departamentu servisu munisipál.
Nomeiasaun Sekretáriu Munisipál, Diretór Servisu Munisipál no Administradór Postu Administrativu sira, tuir artigu 32 Dekretu-lei númeru 3/2016 ,16 marsu, ho redasaun aprovadu husi Dekretu-lei númeru 84/2023 , 23 novembru, konsidera diretór munisipál hanesan responsavel husi Diresaun Servisu Munisipál ierarkia husi Prezidente Autoridade Munisípiu Covalima.
Dekretu-Lei númeru 3/2016, 16 marsu, ho redasaun aprovadu husi Dekretu-lei númeru 84/2023 , 23 novembru, maibé iha despaixu ne’e seidauk fiksa prezidente autoridade foun ba Covalima.
Tuir publikasaun Jornál Repúblika, iha loron 29 fulan-janeiru, diretór munisipál na’in-18, administradór postu na’in-hitu no sekretáriu na’in-tolu ne’ebé simu pose mak Albeto Moniz de Araújo asume Kargu Sekretáriu Munisipál ba Administrasaun no Finansa, Caetano Ribeiro ba Sekretáriu Munisipál Planeamentu Investimentu no Dezenvolvimentu Integradu, Miguel Armada Cardoso ba Sekretáriu Munisipál asuntu Sosiál no Organizasaun.
José Manuel Gonçalves asume funsaun Diretór Servisu Munisipál Administrasaun Rekursu Umanu, Rosita Freitas ba kargu Diretora Servisu Munisipál Finansa, Aquinelio do Rego ba Diretór Servisu Munisipal Patromónio Lojistika ,Roberto Alvaro Gomes nu’udar Diretór Servisu Aprovizionamentu, Carlito Barros Reis ba Diretór Servisu Planeamentu Integradu no Dezenvolvimentu.
Maria de Jesus Perreira asume kargu nu’udar Diretora Servisu Munisipál Apoiu Organizasaun Naun-Governamentál no Organizaun Komunitária, Elda de Fátima ba Diretora Servisu Munisipál Edukasaun, Domingos Sequeira ba Diretór Servisu Munisipál Saúde, Hilário Oliveira ba Diretór Servisu Munisipál Seguransa Alimentár no elementu seluk tan.
Aleinde ne’e, Elias da Cruz asume ba kargu Administradór Postu Administrativu Fatululik, Cesar Madeira ba administradór Fatumea, Delfim Amaral ba postu Fohorem, Laurentino de Jesus ba postu Maucatar, Idelfonso Maria Amaral ba postu Suai,Venancio Sarmento ba postu Tilomar no Alípio Magno ba postu Zumalai.
Notísia relevante: MAE sei revee estratéjia desentralizasaun administrativa no instalasaun bá órgaun reprezentativu podér lokál
Administradór Postu Administrativu Maucatar, Laurentino de Jesus, ne’ebé hetan fiar ba mandatu tinan lima promete katak sei fó prióridade ba programa infraestrutura bázika.
Ba nia, atu hala’o dezenvolvimentu infraestrutura presiza halibur intelektuál sira hodi rona sira-nia aspirasaun hodi halo planu ba dezenvolvimentu iha postu refere.
“Dezenvolvimentu iha postu Maucatar fó prióridade ba infraestrutura bázika hanesan edukasaun, saúde, estrada, bee-moos, tanba durante ne’e povu sempre halerik”, Laurentino de Jesus hatete iha salaun ótel Diamond, Camnasa, ohin.
Nia dehan atu rezolve povu nia preokupasaun kona-ba bee-moos presiza koordena ho Bee Timor-Leste (BTL,E.P) hodi halo estudu atu identifika bee-matan, nune’e bele dada bee-moos ba komunidade. Ba infraestrutura mak sei haree ba estrada protokolu liga ba iha suku sira, tanba kondisaun estrada aat komunidade suku Holpilat, Ogues, Matai no Belekasak difísil atu lori sira-nian produtu bá fa’an iha kapitál munisípiu.
Ba setór saúde sei foku ba oinsá atu kria sentru atendimentu ba povu sira hanesan iha suku Holpilat iha aldeia Lela, Nainare no Hatu atu labele la’o dook ba halo tratamentu saúde.
Iha sorin seluk, Administradór Postu Suai, Venâncio Sarmento, prontu atu serbí povu tuir programa Governu nian, liuliu liga ba agrikultura, saúde no edukasaun.
Jornalista: Celestina Teles
Editora: Maria Auxiliadora
