DILI, 06 fevereiru 2024 (TATOLI)—Inspetór Jerál Autoridade Inspesaun Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P), Ernesto Monteiro, nota katak públiku iha loron ikus ne’e preokupa ho sasán expiradu iha loja, tanba ne’e nia espera ministériu tutela bele konsidera ninia pedidu estende kontratu funsionáriu 118 ne’ebé termina ona iha loron 31 dezembru 2023.
“Hau-nia esperansa no pedidu maka bele estende kontratu funsionáriu kontratadu 118 ho razaun ema sira ne’e treinadu ona, iha ona esperiénsia no kapasidade hodi atende situasaun iha terrenu. Ha’u rona informasaun Ministru sei la diskrimina ema ida ka hapara sira-nia kontratu, maibé sei estende tan,” Inspetór informa ba Agência Tatoli, iha ninia knaar fatin, Matadoro, tersa ne’e.
Notísia relevante : AIFAESA,I.P nia atividade paradu provizóriamente tanba funsionáriu 118 termina kontratu
Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuady Lay, antes ne’e hasai despaisu ida hodi la extende kontratu funsionáriu hosi institutu públiku no empreza públika tutela Ministériu Koordenadór Asuntu Ekonómiku (MKAE) ne’ebé termina iha loron 31 dezembru 2023. To’o agora seidauk iha desizaun ruma tanba ministru halo hela tratamentu saúde iha rai-li’ur.
Ernesto Monteiro dehan, loloos instituisaun Estadu ida funsiona tuir regra sira ne’ebé iha hodi hala’o knaar atendimentu públiku.
“Ha’u halo ona esforsu hato’o ba Gabinete MKAE kona-ba públiku kestiona sasán sira iha terrenu inkontroladu. Tuir informasaun ne’ebe ha’u hetan Ministru bele mai semana ne’e nia laran, ami iha esperansa iha tempu badak situasaun sei rezolve hodi atividade rutina sira sei la’o fali,” nia akresenta.
Jornalista : Arminda Fonseca
Editora : Julia Chatarina
