iklan

NASIONÁL, HEADLINE

CNC, I.P harii ona muzeu memoriál iha munisípiu haat

CNC, I.P harii ona muzeu memoriál iha munisípiu haat

Diretór Ezekutivu CNC, I.P, Hugo Maria Fernandes. Imajen Tatoli/Egas Cristóvão

DILI, 07 fevereiru 2024 (TATOLI)—Centro Nacional Chega, Institutu Públiku (CNC,I.P) iha tinan 2023 konsege harii ona muzeu memoriál iha munisípiu haat.

“CNC, I.P nia papél maka halo prezervasaun memória, ne’ebé hanesan serbisu ida mak ita halo liuhosi harii muzeu memoriál munisipál sira. Tinan kotuk ita harii ona muzeu memoriál iha munisípiu haat hanesan Suai Covalima, Viqueque, Aileu no Maliana Bobonaro,” Diretór Ezekutivu CNC, I.P Hugo Maria Fernandes, hateten, liuhosi programa entrevista eskluziva live streaming, iha estúdiu Farol, kuarta ne’e.

CNC, I.P estabelese muzeu memoriál ho objetivu atu prezerva dokumentu istóriku sira iha períodu 1974-1999 no fasilita informasaun kona-ba istória pasadu ba públiku.

“Estabelese muzeu ne’e hodi fasilita ema hotu bele asesu dokumentu istória Timor-Leste, espesialmente ba munisípiu sira tanba liuhosi fatin ne’e ne’e bele hatudu ba jerasaun foun no estudante sira iha munisípiu bele ba vizita hodi haree memória no dokumentu sira ne’ebé uluk CAVR halibur hosi munisípiu ita lori fila ba. Entaun munisípiu la presiza mai to’o Dili maibé sira bele ba muzeu memoriál iha munisípiu,” nia akresenta.

Notísia relevante : Governu inaugura Muzeu Memoriál Munisipál Bobonaro

Institutu públiku ne’e iha ona planu tinan ne’e atu estabelese muzeu memoriál iha munisípiu seluk tan.

Aleinde ne’e, liuhosi prezevasaun CNC, I.P mós halo hotu ona dokumentasaun ba sítiu istóriku sira, ne’ebé tinan ne’e sei finaliza iha Rejiaun Administrativa Espesiál Oé-cusse no Ambeno (RAEOA).

“Prezevasaun fatin ne’e ho tipu hanesan fatin sentru detensaun, fatin demonstrasaun atu hatudu direitu ba auto determinasaun hanesan Igreja Motael, Santa Cruz, Tasi-tolu, no fatin Masakre, ita harii plaka sira iha hotu hahú hosi munisípiu to’o mai Dili,” diretór informa.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!