CNC, I.P tinan ne’e sai uma-na’in ba konferénsia internasionál GIJTR
DILI, 07 fevereiru 2024 (TATOLI)—Centro Nacional Chega, Institutu Públiku (CNC, I.P) iha fulan agostu tinan ne’e, sei sai uma-na’in ba konferénsia internasionál kona-ba Global Initiative for Justice Truth and Reconciliation (GIJTR), ne’ebé sei realiza iha Dili no sei partisipa hosi nasaun kuaze 40.
Diretór Ezekutivu Centro Nacional Chega, Institutu Públiku, (CNC, I.P), Hugo Maria Fernandes, hateten, Timor-Leste daudaun sai ona membru GIJTR ne’ebé halibur ona nasaun hamutuk 50.
“Global Initiative for Justice Truth and Reconciliation ne’e hanesan organizasaun globál ne’ebé hala’o ho komunidade atu haboot lian sobrevivente no inspira hahalok koletivu iha nasaun sira ne’ebé hasoru difikuldade atu konfronta ho violasaun direitu umanu,” Diretór informa ba Agência Tatoli, hafoin dada-lia iha programa entrevista eskluziva live streaming, iha estúdiu Farol, kuarta ne’e.
Notísia relevante : CNC, I.P iha tinan ne’e kontinua ho programa prioridade tolu
CNC, I.P halo esforsu tomak ba pás no rekonsiliasaun tuir relatóriu Komisaun Akollimentu, Verdade no Rekonsilliasaun (CAVR, sigla portugés) hodi Timor-Leste bele sai membru GIJTR.
“Esforsu ne’ebé ita halo maka Timor-Leste liuhosi CNC, I.P tinan kotuk hetan prémiu pás no rekonsiliasaun hosi Kámara Munisipál Gernika-Lumo iha Español, ne’ebé prémiu ne’e bazeia ba relatóriu Simu Malu Lia Loos no Rekonsiliasaun ne’ebé mak hahú knaar iha tinan 2001 to’o 2005 hodi prodús relatóriu Chega,” nia akresenta.
Komité prémiu pás no rekonsiliasaun Gernika 2023 ne’ebé haknaar-an iha Alemaña oferese prémiu nu’udar meiu rekoñesimentu ba CAVR iha promosaun dame, rekonsiliasaun no prezervasaun memória ba konflitu pasadu liuhosi edukasaun ba jerasaun foun no sosiedade tomak inklui solidariedade ba sobrevivente vulnerável sira.
“Prémiu ne’e atribui mai Timor-Leste liuhosi CAVR no CNC, I.P tanba sira rekoñese Estadu Timor-Leste harii prosesu sira ba manutensaun pás no rekonsiliasaun no haree katak ita iha seriedade no vontade di’ak, nune’e hafoin konflitu Timor-Leste harii mekanizmu sira atu lori ita ba mantein pás nomós hametin rekonsiliasaun hosi CAVR ba CVA to’o mai CNC,I.P,” Diretór tenik.
Prémiu ne’e daudaun rai hela iha edifísiu CNC, I.P, ne’ebé Komité prémiu husu Timor-Leste kontinua promove relatóriu sira ne’ebé iha liu-liu liga ba pás no rekonsilliasaun.
Jornalista : Arminda Fonseca
Editora : Julia Chatarina
