iklan

DILI, INKLUZAUN SOSIÁL

Ema ho Defisiénsias 65 asesu edukasaun iha 2024

Ema ho Defisiénsias 65 asesu edukasaun iha 2024

Diretór Interinu AHDMTL, Gabriel Ponciano de Sousa. Imajen Tatoli/Francisco Sony

DILI, 07 fevereiru 2024 (TATOLI)–Diretór Interinu Asosiasaun Halibur Defisiénsia Matan (AHDMTL), Gabriel Ponciano de Sousa, hateten Ema ho Defisiénsia (EhD) hamutuk 65 mak asesu edukasaun hodi hala’o estudu iha eskola públiku sira iha Timor-Leste iha tinan 2024 ne’e.

Notísia Relevante: MEJD garante Ema ho Defisiénsia hotu bele asesu edukasaun inkluzivu

“Iha anu letivu 2024 nian ne’e ami daudaun ne’e koordena ho eskola públiku sira hanesan Ensinu Rokerente inklui Universidade Nasionál Timor-Leste atu ita-nia kolega ema ho defisiénsia 65 asesu mós ba edukasaun. Ita sei fahe ba Ensinu Sekundáriu Jerál Movel, Ensinu Sekundáriu Finantil, Eskola Paulos no iha ensinu rekorente rasik inklui ho UNTL no Universidade da Paz,” Diretór AHMDTL ne’e hateten Agência Tatoli liuhosi telefónika, kuarta ne’e.

Hosi ema na’in-65 ne’e kompostu hosi feto 30 no mane 35, no iha ema ho defisiénsia na’in-haat (4) mak eskola iha UNTL no restante ne’e eskola iha eskola públiku sira.

“Sira-nain 65 ne’e ita AHMDTL mak esforsu no buka meiu, nune’e sira mós bele asesu ba edukasaun. Ami lakohi, ami defisiénsia iha kotuk nune’e ami hakarak defisiénsia mós tenke hamriik hanesan ho ema lahó defisiénsia sira iha setór saida de’it iha ita-nia rain,” nia dehan.

Ema ho defisiénsia hirak ne’e asesu edukasaun maibé preokupasaun boot mak asesibilidade infraestrutura eskola nian mak sai problema ba ema ho defisiénsia sira no ida-ne’e la proteje ema defisiénsia sira, maibé hakarak ka lakohi ida-ne’e mak sai obstakulu maibé ema ho defisiénsia sira nafatin iha obrigasaun hodi asesu ba edukasaun.

“Ami ema kondisaun defisiénsia mós lakohi lakon asesu ba edukasaun. Tanba ne’e ami nafatin esforsu oinsá bele asesu hanesan mós ema la ho defisiénsia sira. No ami hakarak rekomenda katak Governu presiza duni tau atesaun ba asuntu ne’e,” nia rekomenda.

Tuir relatóriu Planu Asaun Nasionál ba Ema ho Defisiensia (PANED) 2014-2018, dadus publikadu hosi Diretoria Nasionál Estatístika Ministériu Finansa nian hatudu katak ema 48.243 ne’ebé hela iha Timór ho tipu defisiensia nian balun.

Ida-ne’e hosi totál ida hosi ema 1.066.409 ka besik 4,6% hosi populasaun, katak ema ho defisiensia fízika hamutuk 20.593, ema ho defisiensia matan 29.488, ema ho defisiensia tilun 17.692, ema ho defisiensia intelektuál no saúde mentál hamutuk 13.308.

Hosi totál ne’e 53% mane no 47% feto, depois 10,5% iha otas entre tinan 0 no 19 no defisiénsia sai hetok komún iha área rurál sira

Jornalista : Osória Marques

Editór       : Casncio Ximenes

iklan
iklan

Leave a Reply

iklan
error: Content is protected !!