iklan

COVALIMA, HEADLINE

Konsellu Veteranu Covalima hein orientasaun atu halo validasaun ba dadus kombatente  

Konsellu Veteranu Covalima hein orientasaun atu halo validasaun ba dadus kombatente  

Prezidente Konsellu Veteranu Covalima, Osório Soares ‘Mausoko’. Imajen/Celestina Teles.

COVALIMA, 07 fevereiru 2024 (TATOLI) – Prezidente Konsellu Veteranu Covalima, Osório Soares ‘Mausoko’,  hein orientasaun husi Ministru Asuntu Kombatente Libertasaun Nasionál, Gil da Costa “Oan Soru’, atu halo validasaun ba dadus veteranu ne’ebé rejistadu iha 2009.

“Tuir informasaun ne’ebé ha’u simu husi Ministériu Asuntu Kombatente Libertasaun Nasionál katak tempu badak ami tun bá nasionál atu valida dadus. Ekipa ne’ebé atu halo validasaun ba dadus veteranu kompostu husi sekretáriu zona, sekretáriu sub-rejiaun no konsellu veteranu munisipál”, Osorio Soares dehan, ohin.

Nia salienta katak hafoin halo validasaun dadus, sei taka sai lista naran veteranu iha postu no suku sira durante loron 30 hodi hein reklamasaun husi kombatente sira kona-ba naran ne’ebé taka ne’e.

Aleinde ne’e, nia fó hanoin ba kandidatu veteranu ne’ebé seidauk tau naran atubele halo rejistu, nune’e bele hatene númeru loloos kandidatu na’in hira.

Rezultadu dadus provizóriu validasaun Konsellu Kombatente Libertasaun Nasionál Covalima hamutuk 9.931 mai husi postu administrativu Fatumea iha 322, Fatululik 479, Fohorem 1.440, Tilomar 790, Zumalai 2.326, Maucatar 1.844 no Suai  2.524.

Dadus pendente husi postu hitu ne’e iha na’in-958 – mate 2.743 no moris 7.188 ne’ebé kompostu husi feto 4.224 no mane 5.707.

Sekretáriu Nurep, Suku Lalawa, Posto Tilomar, Julião da Silva ‘Naru Tialai’, dehan atu valida dadus kandidatu veteranu rejistadu 2009 ne’e presiza prezensa estrutura husi baze ne’e importante, tanba sira mak koñese nia membru-sira.

“Ami-nian prezensa importanta bainhira atu valida dadus, tanba ami ne’ebé mak iha estrutura atu koñese ami-nian membru sira ne’ebé partisipa iha luta ba ukun rasik aan”, realsa.

Notísia relevante: MAKLN valida ona 81,8% dadus veteranu rejistadu tinan 2009

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!