DILI, 07 fevereiru 2024 (TATOLI)—Ekipa responsável Ministériu Asuntu Kombatente Libertasaun Nasionál (MAKLN) liuhosi Diresaun Nasionál Pensaun no Subvensaun (DNPS) finaliza ona verifikasaun dadus veteranu rejistradu 2009, ne’ebé provizóriumente valida ona 102.049 (81,8%), hosi totál rejistadu 124.782.
“Hosi validasaun provizóriu ne’e ekipa mós rejista veteranu la valida hamutuk 22.733, reprezenta 18,2%,” Diretór Nasionál Pensaun no Subvensaun, Manuel Araújo dos Santos, informa ba Agência Tatoli, iha ninia knaar fatin, Caicoli, kuarta ne’e.
Notísia relevante : Posibilidade Governu foun mak sei halo validasaun dadus veteranu rejistadu 2009
Dadus veteranu ne’ebé la valida tanba balun la marka prezensa bainhira ekipa halo verifikasaun dadus.
“Númeru veteranu valida ne’ebé iha ona hosi sira ne’e ita atu hatene karik balun falsifika dokumentu (veteranu falsu) ne’e hein rezultadu validasaun taka sai mak hatene tanba iha públikasaun ne’e sei iha períodu ruma ema halo reklamasaun,” nia akresenta.
Tuir planu tinan ne’e sei taka rezultadu dadus validasaun, ne’ebé desizaun hotu sei foti hosi reuniaun kuadru ka Prezidente Konsellu sira hamutuk ho membru Governu sira maka foin halo avaliasaun nasionál hotu hodi asina no foti desizaun.
“Ami prepara papél téknika ona maibé desizaun hotu sei foti hosi avaliasaun finál, ita hotu sei hein rezultadu asina editál ne’e. Ami fiar validasaun finál sei akontese tinan ne’e tanba hosi públikasaun mak sei hatene veteranu kombatente ka la kombatente,” Manuel tenik.
Jornalista : Arminda Fonseca
Editora : Julia Chatarina
