iklan

EDUKASAUN, DILI

Konstrusaun Eskola 5 de Maio Becora atinje ona 50%

Konstrusaun Eskola 5 de Maio Becora atinje ona 50%

Konstrusaun sala-de-aula ualu (8) iha Eskola Ensinu Sekundáriu Jerál Públiku 5 de Maio Becora atinje ona 50%. Imajen Tatoli/Osória Marques.

DILI, 07 fevereiru 2024 (TATOLI)–Diretór Eskola Ensinu Sekundáriu Jerál Públiku 5 de Maio Becora, Adelino Nicolau, hateten konstrusaun sala-de-aula ualu (8) iha eskola 5 de Maio Becora atinje ona 50%.

Notísia Relevante: Konstrusaun edifísiu eskola ESG 5 de Maio foin atinje 20%

“Konstrusaun eskola ho nia sala ualu ho andar ne’e foin mak atinje 50% tanba fui ona simente ona iha leten. Husu atu aselera konstrusaun, nune’e ita bele uza ba prosesu aprendizajen, tanba ami iha-ne’e sala-de-aula 13 de’it mak ami uza hodi hanorin no ami mós didin tan sala ida iha liur hodi uza. Entaun sala-de-aula hamutuk 14 ne’ebé kobre ba dadeer no lorokraik, maibé sedauk sufisiente atu akumula labarik sira,” Diretór Eskola 5 de Maio Becora ne’e hateetn ba Agência Tatoli iha nia kna’ar fatin, Becora, kuarta ne’e.

Tuir loloos, nia dehan, konstrusaun eskola ne’e finaliza iha outubru 2022 maibé prosesu mak tarde no lentu, ne’e mak to’o agora seidauk bele finaliza.

“Husu ba parte ministériu edukasaun no kompañia ho ADN tanbasá mak tarde loos, buat fulan neen mós seidauk hotu. Tanba falta koordenasaun ho di’ak, depois materiál kostrusaun mai tarde. Ho ida-ne’e ha’u hateten hela ba enjiñeiru edukasaun ho ADN tenke kontrola prosesu konstrusaun ne’e. Tanba sala-de-aula ida-ne’e ami garante, tanba bele akumula estudante 1.456,”  nia dehan.

Ni hateten, Planta no Kadernu Enkargu ka Bill of Quantity (BoQ) ba konstrusaun ne’e klaru ho nia traballadór 50, maibé bainhira kesi besi mak foin traballadór ne’e mai no agora atu fui (cor) simente traballadór na’in-10 to’o 15 de’it tanba uza mákina.

“Tanba ida-ne’e mós bele tarde maibé ida-ne’e kompeténsia edukasaun nian. Ha’u mós rekomenda ona ba Governu, momentu sei Governu anteriór nia tempu, no dehan tenke aselera konstrusaun ne’e tanba ami presiza,” nia hateten.

Tanba, kada tinan ezame nasionál ne’e sempre ba tuir ezame ho eskola Paiol, Eskola Ensinu Sekundáriu Tékniku Voaksionál Becora no tinan kotuk ne’e ba ezame iha eskola bázika Sergio Vieira de Melo nian, tanba estudante númeru boot.

Aleinde ne’e, iha mós difikuldade dixiplina alunu mak falta no manuál ba bibileoteka mak falta, no rekomenda no haruka ona karta ba edukasaun nasionál maibé to’o agora seidauk iha resposta, entan ida-ne’e mak sai difikuldade ba prosesu aprendizajen.

Iha eskola ne’e sala-de-aula menus maibé halo turnu dadeer no lorokraik, nune’e husu ba kompañia atu aselera konstrusaun ida-ne’e.

Eskola Ensinu Sekundáriu Jerál Públiku 5 de Maio Becora ne’e iha profesór permanente hamutuk 59 ne’ebé kompostu hosi feto 22 no mane 37, ho totál estudante hamutuk 1.456 no sala-de-aula hamutuk 14.

Kestaun ne’e, jornalista Agência Tatoli konfirma jerente Kompañia Maluk Unipesoál, Lda, maibé lafó informasaun.

Konstrusaun ne’e hahú iha abríl 2022 no loloos finaliza iha outubru 2022 maibé tanba kestaun seluk la konsege finaliza, entaun kontinua estende ba fulan neen tan maibé foin mak atinje 50%.

Orsamentu ba konstrusaun Eskola Ensinu Sekundáriu Jerál Públiku 5 de Maio Becora, hodi konstrui sala-de-aula ualu (8) ne’e hamutuk $355.629,46.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!