iklan

NASIONÁL, EDUKASAUN, DILI, HEADLINE

Konstrusaun edifísiu eskola ESG 05 de Maio foin atinje 20%

Konstrusaun edifísiu eskola ESG 05 de Maio foin atinje 20%

Estudante Eskola Sekundária Jerál 05 de Maio Becora. Imajen/Espesiál.

DILI, 25 janeiru 2023 (TATOLI)–Diretór Eskola Ensinu Sekundáriu Jerál (ESG) 05 de Maio Becora, Adelino Nicolao Ornai, konsidera konstrusaun edifísiu foun ida ho sala-de-aula ualu (8) iha eskola 05 de Maio ne’e foin atinje 20%.

Nia hatutan, konstrusaun projetu kapitál dezenvolvimentu ho kustu $355,629.46 ne’ebé kaer hosi kompañia Maluk Unipesoal, Lda ne’e paradu tiha durante fulan rua no foin mak hahú fila-fali tanba ADN konsidera kompañia Maluk Unipeso’al, Lda, ne’e la hatudu ninia responsabilidade ba konstrusaun no la tuir rekezitu.

“ADN trava tiha konstrusaun ne’e tanba bainhira ADN mai halo verifikasaun haree katak pengecoran ne’e mak la tuir espesifikasaun kontratu ne’ebé iha. Tanba ne’e ADN husu sira tenke halo kompleta tiha depois mak kontinua fali,” nia hateten ba Agência Tatoli iha eskola ESG 05 de maio Becora, tersa ne’e.

Prosesu konstrusaun hahú no agora tama ona sinta jerál, espera katak konstrusaun ne’e bele hotu lalais atu nune’e bele entrega ba eskola hodi utiliza ba prosesu ensinu aprendizajen tanba tarjetu ba konstrusaun ne’e adianta demais ona.

“Ha’u hakarak dehan de’it katak konstrusaun ne’e loloos ninia durasaun tempu fulan neen de’it hahú hosi 20 de abríl 2022 no sei finaliza iha 20 de outubru 2022. Maibé tanba la tuir rekezitu ADN mai trava tiha. Ne’ebé agora tama ona tinan foun konstrusaun ne’e foin mak atinje 20%,” nia dehan.

Diretór ne’e relata, konstrusaun projetu kapitál dezenvolvimentu ne’e tuir dezeñu no Planta Kadernu Enkargu (BoQ) ne’ebé iha sei kompleta ho sala-de-aula ualu ba edifísiu ida, inklui sala haat iha kraik no sala haat iha andár leten no sala sira-ne’e sei akumula estudante hamutuk 45 atu nune’e fasil ba profesór sira bele kontrola estudante sira.

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!