DILI, 07 fevereiru 2024 (TATOLI)—Ministériu Asuntu Kombatente Libertasaun Nasionál (MAKLN), tinan ne’e prevee orsamentu $1.127.750 hodi atribui bolsa estudu ba veteranu no mártir nia oan hamutuk 1.300 iha territóriu nasionál.
“Konforme ami-nia kalendáriu sei halo abertura ba atribuisaun iha loron 05 marsu hafoin komemora loron veteranu iha loron 03 marsu ekipa sei desloka ba munisípiu sira,” Diretór Nasionál Pensaun no Subvensaun, Manuel Araújo dos Santos, informa ba Agência Tatoli, iha ninia knaar fatin, Caicoli, kuarta ne’e.
Notísia relevante : 2024: MACLN atribui bolsa estudu ba veteranu nia oan 1.300
Atribuisaun bolsa estudu ba veteranu nia oan ne’e ba kada tinan, bazeia ba rejime atribuisaun bolsa estudu ba veteranu mártir libertasaun nasionál nia oan, nune’e iha tinan letivu ne’e, MAKLN hasai ona despaisu númeru 02/MACLN-IXGC/1/2024 ne’ebé hatúr kedas númeru ba vaga sira ne’ebé hakerek iha númeru 2 hosi despaisu ne’e bazeia ba nível ensinu sira.
Bolsa estudu atribui ba estudante hosi ensinu báziku to’o ensinu superiór, kompostu hosi ensinu báziku siklu 1o hamutuk 65 kada munisípiu ema na’in-lima, ensinu báziku siklu 2o no 3o hamutuk 195 kada munisípiu ema na’in-15, ensinu sekudáriu hamutuk 325 kada munisípiu na’in-25, ensinu superiór univerisitáriu Timor-Leste hamutuk 350 kada munisípiu ema na’in-50 no ensinu superiór iha rai-li’ur na’in-65 kada munisípiu na’in-lima.
Ba ensinu báziku siklu 1o kada bolseiru sei hetan osan ho montante $300, ensinu báziku siklu 2o no 3o hetan $600, ensinu sekudária hetan $650, ensinu superiór Univerisitáriu Timor-Leste hetan $1.000 no ensinu superiór rai-li’ur hetan $2.000.
Jornalista : Arminda Fonseca
Editora : Julia Chatarina
