iklan

NASIONÁL, EDUKASAUN, HEADLINE

SEFOPE no AHHA education selebra akordu apoia formasaun lian inglés ba timor-oan

SEFOPE no AHHA education selebra akordu apoia formasaun lian inglés ba timor-oan

Sekretáriu Estadu Formasaun no Profisionál, Rogério Araújo Mendonça (karuk) no Diretór AHHA Education, Madenjit Singh (loos), troka nota akordu iha salaun SEFOPE, Caicoli, kuarta (07/02/2024). Imajen Tatoli/Antónia Gusmão

DILI, 07 fevereiru 2024 (TATOLI)–Sekretaria Estadu Formasaun no Profisionál (SEFOPE) no AHHA Education-SOLS 24/7, kuarta ne’e, selebra akordu ida hodi apoia formasaun lian inglés ba timor-oan sira.

Akordu ne’e asina hosi Sekretáriu Estadu Formasaun no Profisionál, Rogério Araújo Mendonça no Diretor AHHA Education, Madenjit Singh. 

Iha biban ne’e, Sekretáriu Estadu Formasaun no Profisionál, Rogério Araújo Mendonça, konsidera lian inglés importante tebes ba timor-oan, liu-liu joven sira ne’ebé bá serbisu iha rai-li’ur inklui rai-laran rasik.

“Objetivu akordu ne’e mak SOLS sei apoia formasaun ba joven sira tanba ninia sentru formasaun estabelese to’o ona postu no suku. Tanba durante ne’e joven barak buka formasaun iha kapitál entaun kria polítika ida hodi lori filafali joven sira ne’e bá munisípiu tanba iha munisípiu mós iha sentru formasaun, ne’ebé sei ajuda tebes sira atu aumenta koñesimentu iha lian inglés,” Governante ne’e hateten hafoin asina akordu, iha salaun SEFOPE, Caicoli, kuarta ne’e.

Notísia relevante : SEFOPE no PNUD selebra akordu ba atividade hitu

SOLS sei sai parseiru ba SEFOPE ba implementasaun programa durante tinan-rua, hahú 2024 to’o 2026.

“Interrese SEFOPE maka formadór tenke iha kualidade, labele loke formasaun iha fatin-fatin maibé la kria kondisaun ba formandu, ida-ne’e problema boot. Akordu ne’e asina ba tinan-rua, maibé depois avaliasaun hosi SEFOPE kada munisípiu no rekursu umanu la sufisiente, kondisaun ba formandu sira ladun di’ak, ida-ne’e ami sei revee filafali akordu tanba ita hatene katak padraun INDMO hateten klaru katak harii sentru formasaun ida tenke iha kondisaun di’ak, formadór kualidade,” nia fó hanoin.

Formasaun SOLS nian liga kedas ba merkadu li’ur nomós rai-laran, hanesan serbisu hosi mobilidade laborál Austrália besik ona atinje rihun 14, entaun haree formasaun sira liu-liu lian inglés.

“Ita tenke prepara formandu sira ne’e ho kualidade, ne’ebé ho akordu  estabelese ona SOLS sei fó formasaun lian inglés ba joven sira,” nia tenik.

Governante ne’e klarifika mós katak, akordu ne’e SEFOPE la apoia fundu ruma maibé iha kompeténsia hodi halo monitorizasaun durante prosesu formasaun la’o to’o finál.

Diretór AHHA Education, Madenjit Singh, apresia ba inisiativa SEFOPE nian hodi estabelese kooperasaun tanba SOLS antes ne’e kapasita ona timor-oan barak, liu-liu lian inglés.

“AHHA Education ou SOLS koko halo ho ami-nia esforsu tomak hodi lori edukasaun gratuita ba maluk mukit sira ho mehi ida katak ema timor-oan hotu bele iha abilidade hodi ko’alia inglés,” Madenjit Singh, haktuir.

AHHA iha tinan iha 2024 estabelese ona sistema foun hodi hanorin inglés ba sé de’it mak hakarak apreende, ho durasaun fulan-tolu nia laran.

“Ami mós iha sistema foun atu hanorin lian inglés ba sé de’it mak hakarak apreende. Entaun, iha tinan 2024 ne’e ami hakarak lori portugés no inglés ba nasaun tomak atu nune’e ema timor-oan hotu bele ko’alia lian inglés no portugés ho di’ak. Ami hakarak hato’o agradese wa’in ba SEFOPE tanba sai ona parseiru di’ak hodi lori edukasaun ba ema hotu,” nia apresia.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!