DILI, 05 fevereiru 2024 (TATOLI)–Sekretaria Estadu Formasaun Profisionál no Empregu (SEFOPE), segunda ne’e, selebra akordu ho Programa Nasaun Unida ba Dezenvolvimentu (PNUD) ba atividade hitu, liuhosi programa Youth Employment and Entrepreneurship Skill (YEES).
Akordu ne’e asina hosi Sekretáriu Estadu Formasaun Profisionál no Empregu Rogério Araújo Mendonça no Katyna Argueta reprezenta PNUD.
Biban ne’e, Sekretáriu Estadu Rogério Araújo, hateten, akordu ne’e importante tebes tanba atividade sira ne’e sei fó benefísiu direta ba populasaun.
“Ami asina akordu ne’e sei implementa atividade hitu, ne’ebé ninia serbisu iha duni diresaun nasionál ne’ebé sei serbisu hamutuk ho PNUD, mak Diresaun Nasionál Empregu Estranjeiru, ne’ebé departamentu ida ko’alia kona-ba reintegrasaun, diresaun nasionál empregu ko’alia kona-ba akonsellamentu profisionál ba estudante, espozisaun karreira, no programa seluk mak serbisu ka empregu temporáriu ne’ebé maka bele fó ita-nia komunidade sira,” Governante ne’e hateten hafoin asina akordu, iha salaun SEFOPE Caicoli, segunda ne’e.
Notísia relevante : SEFOPE despede timor-oan na’in-hitu ba serbisu iha Japaun faze daruak
Nia dehan, programa reintegrasaun ne’e importante tebes tanba traballadór sira bainhira fila hosi Austrália, Koreia Súl no Japaun sei ba iha departamentu ne’e hodi apoia no lori traballadór sira ne’e atu hetan empregu bainhira para hosi serbisu iha rai-li’ur.
Orsamentu ne’ebé PNUD apoia ba atividade sira ne’e hamutuk millaun $8-resin no antes apoia ona orsamentu millaun $5,3 ne’ebé implementa iha tinan 2022-2027.
Iha biban hanesan, Reprezentante Rezidente PNUD, Katyna Argueta, reforsa, akordu ne’e hodi parte rua bele realiza serbisu sira ne’ebé durante ne’e iha ona konkordánsia.
“Ami-nia espetativa maka hakarak atinje objetivu sira ne’ebé prevee ona iha akordu ne’e rasik bazeia ba Objetivu Dezenvolvimentu Sustentável (ODS) ne’ebé Governu Timor-Leste rasik opta,” nia tenik.
Jornalista : Antónia Gusmão
Editora : Julia Chatarina
