iklan

BOBONARO, HEADLINE, MUNISÍPIU, POLÍTIKA

Ema hotu presiza ativu iha promosaun podér lokál no desentralizasaun administrativa

Ema hotu presiza ativu iha promosaun podér lokál no desentralizasaun administrativa

Vise-Ministru Administrasaun Estatal, Jacinto Rigoberto de Deus. Imajen Tatoli/Francisco Sony.

BOBONARO, 08 fevereiru 2024 (TATOLI) — Vise-Ministru Administrasaun Estatal, Jacinto Rigoberto, husu ema hotu-hotu atu partisipa ativu iha promosaun podér lokál no desentralizasaun administrativa atubele tulun Governu implementa polítika ne’e ba iha munisípiu idak-idak.

Jacinto Rigoberto hateten desentralizasaun administrativa ne’e la’ós prosesu simples no lalais, tanba presiza invesimentu iha kapasitasaun infraestrutura no mekanizmu presta apoiu ba funsionáriu munisipál sira.

Nia sei ezije mós diálogu konstante entre governu sentrál ho munisípiu sira, atubele garante koordenasaun no armonizasaun polítika no asaun iha país laran.

Notísia relevante: MAE sei revee estratéjia desentralizasaun administrativa no instalasaun bá órgaun reprezentativu podér lokál

“Iha sentidu ida-ne’e fundamentál tebes ba setór sosiál no polítiku sira hotu tenke envolve-aan no partisipa iha promosaun desentralizasaun administrativa iha Timor-Leste, nomeadamente liuhosi asembleia postu administrativu no konselu konsultivu munisipál, partipasaun ativa hosi sosiedade sivil, setór privadu no komunidade tradisionál ne’e importante tebes ba asesu implementasaun ba polítika desentralizasaun administrativu,” nia hateten iha Jináziu Maliana, kuarta ne’e.

Nia dehan, desentralizasaun administrativa nu’udar oportunidade úniku atu promove dezenvolvimentu lokál ho koezaun territoriál, nu’udar mós forma ida atubele garante katak komunidade iha duni lian no partisipasaun ativa iha konstrusaun ba futuru país nian.

“Tanba ne’e maka fundamentál tebes ba ita nu’udar sidadaun no ajente polítiku, ekonómiku no sosiál ita tenke kompromete-aan, fó apoia no promove ezekusaun polítika desentralizasaun administrativa.”

Vise Ministru Administrasaun Estatal ne’e hateten presiza servisu hamutuk ho komunidade munisipál sira, esforsu no fortalese desentralizasaun administrativa hodi promove dezenvolvolvimentu lokál, koezaun territoriál no partisipasaun sívika.

“Esperiénsia iha nasaun seluk hatudu katak bainhira la perpara-aan didiak ba hala’o implementasaun desentralizasaun bele hamosu konsekuénsia todan ka trajédia boot ba nasaun ne’e rasik, nasaun barak hatudu tiha esperiénsia, bainhira la hala’o ho didi’ak, sira-nia nasaun ne’e nakfera hotu, tanba ne’e mai ita prepara-aan didi’ak ba prinsípiu desentralizasaun tenke hala’o ho prinsípiu deskonsentrasaun,” nia fó hanoin.

Alende ne’e loke oportunidade ba partisipasaun demokrátika hosi sidadaun sira hotu no estabelese prestasaun servisu ka atendimentu públiku ida efetivu no ekitativu atubele apoia dezenvolvimentu ekonómiku no sosiál nasaun nian.

“Hala’o politika desentralizasaun administrativa iha ita-nia rain ne’e fundamentál tebes, atubele reponde ba nesesidade espesífika munisípiu idak-idak no garante komunidade hotu-hotu bele hetan asesu igualitáriu ba servisu públiku kualifikadu,” nia hateten.

“Ida-ne’e hametin partisipasaun sívika, estimula inovasaun no kreatividade iha dezenvolvimentu ba projetu no programa sira-ne’ebé kontribui ba halo melloramentu ba hotu-hotu no ida-idak nia moris di’ak no hasa’e kresimentu ekonómiku,” nia katak.

Nia esplika, mekanizmu sira-ne’e permite sidadaun sira bele partisipa barak liu iha toma desizaun no jestaun ba rekursu públiku atubele hametin konfiansa iha administrasaun públika no iha sistema demográfiku, liuhosi desentralizasaun autoridade munisipal iha autonomia boot hodi dirijiona rekursu no dezenvolve polítika espesífiku ba área sira-ne’ebé ladún dezenvolve iha ninia territóriu laran hodi promove igualidade ba oportunidade no ekilibriu territorial,” nia hateten.

Notísia relevante: MAE fó prioridade ba desentralizasaun administrativa-podér lokál iha OJE 2024

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!