iklan

POLÍTIKA

PD husu altera kódigu penál kriminaliza mane ba kazu soe bebé

PD husu altera kódigu penál kriminaliza mane ba kazu soe bebé

Igreja Katólika kontinua apela oinsá sosiedade Timor-Leste atu kuidadu no labele soe bebé. Meius sosializasaun Igreja nian ne'e monta espanduk iha edifísiu Komisaun Justisa no Pás, Igreja Katedrál Dili. Imajen Tatoli/Dok.Eugénio Pereira

DILI, 08 fevereiru 2024 (TATOLI)—Deputadu hosi bankada PD, Rozenha Martins, husu Deputadu sira iha Parlamentu Nasionál (PN) atu aprezenta inisiativa altera kódigu penál hodi kriminaliza mane ba kazu soe bebé.

Notísia Relevante: ANCI-TL rejista kazu soe bebé hamutuk 58 iha tinan 2015-2023

Nia preokupa hodi akompaña fenomenu ikus-ikus ne’e siha osiedade akontese kazu soe bebé, ikus liu mosu tan hanesan iha inisíu tinan 2024 iha Taibesi, suku Lahane Orientál, postu administrativu Na’in Feto, munisípiu Dili.

Haree hosi penalizasaun konsekuénsia kriminál ba feto todan liu no dalawa’in dezliga no la imputa aktu kriminál ne’ebé ba mós mane iha siklu ko-autora ou partisipasaun ou asisténsia, tanba tuir pontu de vista biomédika hatudu katak feto ida isin-rua tanba tenke iha espermatózida ne’ebé mak mai hosi mane ida.

“Ne’eduni, nu’udar feto no inan ida-ne’ebé iha kompromisu luta ba direitu feto no ba labarik sira husu ba ita hotu iha uma fuku ida-ne’e atu foti inisiativa ruma hodi halo took alterasaun ba ita-nia kódigu penal. Hanesan Aliansa Nasionál Luta Kontra Infantísidu sujere hodi kriminaliza ita-nia títulu ko-autór ka partisipasaun, asisténsia depende ba rezultadu investigasaun ba mós mane sira,” Deputada PD ne’e hateten iha uma fukun PN.

Kazu soe bebé ne’e TL nia lei penál kriminaliza depende ba tipu soe bainhira mate ona ka abortu tiha mak soe iha artigu 224 destruisaun, ka soe bainhira sei moris hela lei penal hanaran espozisaun ou abandona artigu 143.

Ida ikus liu mak oho bainhira partu ka depois partu mak soe iha lei penál kategoriza nu’udar kazu infantísidu tuir lei kódiku penál artigu 142 ne’ebé penaliza ba feto.

Aleinde ne’e, nia husu ba família sira tanba família mak selula baze hosi sosiedade entaun família tenke kontrola oan-feto no mane sira, mantein komunikasaun iha família hodi evita kazu soe bebe.

Reprezentante povu iha uma fukun PN ne’e hato’o ba inan feton sira se lakohi kous oan iha meiu barak atu resolve, mak hakbesik aan ba fasilidade saúde atu konsulta iha ne’eba ka kous ona por dezastre no lakohi bebé  bele kontaktu família ka organizasaun seluk atu tau matan ba imi durante isin-rua no partu, hodi partu mós bele entrega bebé ba ema-ne’ebé hakarak ou adota

“Labele soe bebé no soe bebé ne’e ninia konsekuénsia boot no barak iha aspeitu lei, étika no morál inklui iha aspeitu relijiozu. Ho nune’e, mai ita hamutuk ho lian ida de’it atu hateten katak labele soe bebé,” nia hateten.

Jornalista : Nelson de Sousa

Editór         : Cancio Ximenes

 

iklan
iklan

Leave a Reply

iklan
error: Content is protected !!