iklan

NASIONÁL, EKONOMIA, HEADLINE

SEFOPE prodús ona kartaun evidénsia 14.039 durante tinan 2023

SEFOPE prodús ona kartaun evidénsia 14.039 durante tinan 2023

Ilustrasaun kartaun evidénsia. Imajen/Espesiál

DILI, 08 fevereiru 2024 (TATOLI)–Sekretaria Estadu Formasaun Profisionál no Empregu (SEFOPE) prodús ona kartaun evidénsia hamutuk 14.039, kompostu hosi feto 6.619 no mane 7.420 durante tinan 2023 hodi atribui ba timor-oan sira ne’ebé presiza.

Diretór Nasionál Empregu SEFOPE, Lúcio Beretasi dos Santos, hateten, sidadaun hotu presiza iha kartaun evidénsia, liu-liu joven sira tanba fásil atu identifika númeru asesu ba serbisu.

“Kartaun evidénsia ne’e iha nasaun hotu-hotu uza, Timor-Leste mós prodús ona maibé ninia funsaun loloos ne’e mak seidauk funsiona ho di’ak tanba menus informasaun, liu-liu empregadór sira. Kartaun evidénsia ne’e sidadaun hotu presiza iha, liu-liu mak foin-sa’e sira,” Diretór informa ba Agência Tatoli, iha ninia knaar fatin, Caicoli, kinta ne’e.

Notísia relevante : SEFOPE sei prepara timor-oan molok bá serbisu iha Portugal

Timor-oan trata kartaun ne’e tanba presiza akonsellamentu atu halo negósiu rasik, presiza formasaun, inklui buka serbisu iha rai-li’ur no rai-laran.

Funsaun kartaun ne’e maka bainhira empregadór sira presiza ema serbisu iha sira-nia empreza, bele koordena ho instituisaun relevante hanesan Timor karik SEFOPE hodi fasilita rekursu tanba kada ema ida trata kartaun ne’e ho kedas motivu klaru katak hakarak buka serbisu no razaun seluk.

“Bainhira rejista ona hodi hetan kartaun ne’e, nia Kurríkulu Vitae (CV) iha ona nune’e fásil atu hatene,” nia akresenta.

Direjente ne’e otimista katakm IX Governu bele kria ona sistema integradu ida hodi implementa no funsionaliza kartaun evidénsia ne’e ho di’ak nune’e fasilita timor-oan sira ne’ebé presiza empregu.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!