DILI, 08 fevereiru 2024 (TATOLI)—Sekretaria Estadu Formasaun Profisionál no Empregu (SEFOPE) sei prepara traballadór timor-oan iha kestaun lian molok arranka bá serbisu iha Portugal.
Antes ne’e, Sekretáriu Estadu Formasaun Profisionál no Empregu, Rogério de Araújo Mendonça, no Ministra Solidariedade Sosiál no Inkluzaun, Verónica das Dores, asina akordu rua ho Ministra Traballu, Solidaridade no Seguransa Sosiál portugueza, Ana Mendes Godinho, iha loron 04 outubru 2023, iha Lisboa-Portugal.
Akordu rua ne’e mak hanesan administrativu ba aplikasaun konvensaun entre Timor-Leste no Portugal kona-ba seguransa sosiál no memorandu entendimentu kona-ba mobilidade traballadór timor-oan.
“Akordu mobilidade traballadór ho intensaun fó protesaun ba joven timor-oan sira ne’ebé hakarak bá serbisu iha Portugal maibé iha rekezitu hanesan tenke hatene uluk lian portugés, tanba ne’e maka sei harii sentru formasaun ida atu hanorin lian portugés ba timor-oan molok bá Portugal atu nune’e bainhira bá serbisu bele halo komunikasaun di’ak no fásil ho empregadór,” Diretór Ezekutivu Sekretáriu Estratejia Nasionál Empregu, Paulo Alves, hateten ba Agência Tatoli, iha ninia knaar fatin, Caicoli, kinta ne’e.
Notísia relevante : Timor-Leste no Portugal sei selebra akordu rua
Formadór ne’ebé sei halo formasaun hosi Portugal ho kooperasaun hosi SEFOPE tanba programa ne’e responsabiliza hosi SEFOPE hanesan instituisaun governamentál ne’ebé mak hamriik hodi mobiliza traballadór timor-oan sira bá serbisu iha rai-li’ur.
Rekezitu bá serbisu iha Portugal maka tenke iha fíziku di’ak, labele komete krime, no hatene lian portugés.
Maski nune’e, to’o agora seidauk implementa akordu, nune’e hein desizaun tuir mai.
Jornalista : Antónia Gusmão
Editora : Julia Chatarina
