iklan

POLÍTIKA

Bankada CNRT sei buka konsensu ho opozisaun ba komisáriu CAC

Bankada CNRT sei buka konsensu ho opozisaun ba komisáriu CAC

Deputadu Partidu Congresso Nacional de Reconstrução Timorense (CNRT), Patrocínio dos Reis Fernandes. Imajen/Mídia SEKOMS.

DILI, 09 fevereiru 2024 (TATOLI)—Vise bankada CNRT, Deputadu Patrocínio dos Reis Fernandes, hateten sei buka konsensu ho bankada opozisaun iha Parlamentu Nasionál (PN) ba komisáriu Komisaun Anti-Korrupsaun (CAC, siglá portugés).

Notísia Relevante: Governu retira kandidatu komisáriu CAC

Daudaun ne’e, nia hateten, hein Governu atu aprezenta fali kandidatu komisáriu CAC foun mai iha PN.

“Hanoin ne’e obrigasaun Governu nian atu halo, hanoin instituisaun CAC ne’e instituisaun Estadu, lei ne’e fó kriteira ida kórum ne’e tenke Deputadu prezente na’in-49. Signifika katak, se bankada Governu sira la halo movimentu polítiku sei labele konsege atu atinje tuir ezijénsia lei. Ida-ne’e prosesu ida iha hela Governu, ne’ebé Parlamentu hein hela Governu aprezenta kandidatu mai depois Parlamentu bele halo ninia serbisu tuir lei,” Vise bankada CNRT ne’e hateten ba jornalista sira iha uma fukun PN, sesta ne’e.

Tan ne’e, haree ba CAC ne’e interrese Estadu nune’e nu’udar bankada Governu ba oin sei buka konsensu ho bankada opozisaun sira bainhira Governu submete ona kandidatu mai.

“Hanoin ba interrese Estadu komisáriu CAC ne’e la’ós bankada CNRT nian no CAC la’ós atu ba serbi bankada CNRT ka bankada Governu, komisáriu CAC ne’e instituisaun Estadu. Mezmu bankada opozisaun iha dever atu koopera ka kolabora ba funsionamentu dezde ita iha hanoin ida hamutuk oinsá mak dezenvolve instituisaun ne’e,” nia hateten.

Deputadu FRETILIN, Joaquim dos Santos ‘Boraluli’, hateten di’ak liután Governu atu haruka fali kandidatu komisáriu CAC mai PN hanoin ida ne’e  responsabilidade Governu nian mak aprezenta tuir lei ne’ebé iha no nia-parte laiha objesaun  bainhira Governu kumpri lei, tanba CAC kle’ur ona laiha komisáriu entaun ninia knaar ida atu investiga krime korrupsaun ne’e fila-fali ba Ministériu Públiku (MP).

“Ne’ebé, se Governu hanoin ona atu aprezenta kandidatu mai PN atu apresia no aprova ida-ne’e di’ak liután.  Mai mak ita haree, se kandidatu ne’e kona ita-nia laran ita apoia, se la kona ita-nia laran maiória apoiua ne’e apoia ba, ne’e pozisaun polítika. Hanesan kriteira iha lei iha ona ema ne’e labele iha kazu iha Tribunál, imparsiál no nia tenke iha relasaun di’ak ho ema hotu-hotu iha administrasaun, Governu,” nia hateten.

Notísia Relevante: Bankada parlamentár presiza konsensu kona-ba aprezentasaun komisáriu CAC

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!