DILI, 06 fevereiru 2024 (TATOLI)—Deputada husi bankada PLP, Ermenegilda da Costa Laurentina, husu bankada parlamentár presiza konsensu kona-ba aprezenta komisáriu Komisaun Anti-Korrupsaun (CAC, siglá portugés) iha tempu badak.
Notísia Relevante: PN hein Governu deside retira kandidatu komisáriu CAC na’in-ida
“Kona-ba lideransa CAC nian até agora laiha tanba seida’uk iha lideransa CAC, ita ko’alia kona-ba atu kombate korrupsaun bainhira laiha lideransa ida atu haree instituisaun importante ne’e oinsá, kuaze tempu naruk ona maibé nune’e hela de’it. Husu ba bankada parlamentár presiza iha konsenu atu aprezenta nomeasaun komisáriu CAC iha tempu besik,” nia hateten liuhosi intervensaun iha reuniaun plenária PN, tersa ne’e.
Antes ne’e, Vise Ministru ba asuntu Parlamentár, Adérito Hugo da Costa, hateten Governu retira kandidatu komisáriu Komisaun Anti-Korrupsaun (CAC, siglá portugés) na’in-rua (2) ne’ebé antes ne’e iha tinan kotuk submete mai Parlamentu Nasionál (PN).
“Ha’u atualiza ba konferénsia líder bankada katak, depois Governu konsidera retira submisaun ida primeiru iha tinan kotuk nian, no kontinua halo apresiasaun diskusaun iha Konsellu Ministru para fó ona andamentu segundu korespondénsia. Agora segundu korespondénsia ne’e mai ho saida, hau seida’uk pronúnsia buat ida, tenke hein deliberasaun husi Konsellu Ministru,’’Vise Ministru ne’e hateten ba jornalista sira hafoin partisipa reuniaun líder bankada parlamentár iha sala konferénsia PN, kinta (25 favereiru 2024).
Nia hateten, razaun retira tanba iha tinan kotuk submete kandidatu na’in-rua mai, PN liliu bankada sira halo kontaktu la konsege iha konsensu atu prienxe rekezitu ida Deputadu prezente na’in-49 iha sala plenária atu hala’o eleisaun ba komisáriu CAC ne’e rasik.
Nune’e iha fulan janeiru tinan 2024 Governu kondisera korespondénsia dahuluk ne’e la hetan andamentu hosi PN atu halo eleisaun, nune’e konsidera korespondénsia primeiru hotu ona.
“Entaun ami sei halo fali segundu korespondénsia, maibé substánsia ne’e saida. Hau seidauk bele pronúnsia, nune’e ohin aprezenta ba konferénsia líder bankada no Prezidente Parlamentu katak depois korespondénsia ida primeiru la konsege iha andamentu, ami konsidera fali segundu korespondénsia. Maibé segundu korespondénsia mai ho saida seidauk bele pronúnsia,” nia dehan.
Antes ne’e, iha 13 setembru 2023, Governu liuhosi reuniaun Konsellu Ministru (KM), aprova projetu proposta rezolusaun ne’ebé aprezenta hosi Primeiru-Ministru (PM), Kay Rala Xanana Gusmão, kona-ba naran sira hanesan Sérgio de Jesus Fernandes da Costa Hornai no Rui Pereira dos Santos, ne’ebé propoin ba Parlamentu Nasionál ba kargu Komsiáriu CAC nian.
Tuir lejislasaun ne’ebé vigora, naran sira-ne’ebé propoin hosi Governu sei analiza no vota hosi PN, no sira-nia designasaun sei presiza maiória absoluta hosi Deputadu ne’ebé marka prezensa, pelumenus ¾ hosi Deputadu ho funsaun efetiva.
Notísia Relevante: Komisáriu CAC Sergio Hornai nia mandatu ramata iha 21 janeiru
Jornalista : Nelson de Sousa
Editór : Cancio Ximenes
