iklan

COVALIMA, HEADLINE

Ema ho defisiénsia 36 iha suku Lour hetan apoiu foos husi SSSI

Ema ho defisiénsia 36 iha suku Lour hetan apoiu foos husi SSSI

SSSI Covalima distribui foos ba EhD iha Suku Lour, postu Zumalai. Imajen /Celestina Teles.

COVALIMA, 09 fevereiru 2024 (TATOLI) – Sentru Solidariedade Sosiál no Inkluzaun (SSSI) Covalima no Organizasaun Klibur Dezenvolvimentu Sustentavél Timor-oan (KDESTO) distribui foos saku 36 ba Ema ho Defisiénsia (EhD) iha suku Lour, iha postu Zumalai.

Diretór KDESTO, Alfreso dos Santos, hatete apoiu nesesidade bázika ida ne’e hodi hakmaan maluk defisiénsia sira-nian difikuldade ne’ebé sira hasoru, tanba ne’e KDESTO husu tulun liuhusi Sentru Solidariedade Covalima hodi distribui foos ho marka Manu Vitória kilograma 25 ba kada ema.

Molok atu fó tulun, funsionáriu KDESTO bá observa uluk situasaun loroloron ne’ebé mak ema ho defisiensua sira enfrenta, tanba sira labele hala’o serbisu  presiza tulun sira.

KDESTO mós submete ona lista ema ho defisiénsia 44 iha iha postu Zumalai, Tilomar  no Suai   ba iha Sentru Reabilitasaun no iha tempu badak sira sei hetan ekipamentu hanesan kadeira roda, nune’e uza hodi halo movimentasaun.

Reprezentante administradór postu Zumalai, Martinho do Nascimento, agradese  ba  KDESTO ne’ebé serbisu hamutuk ho SSSI Covalima hodi fó apoiu nesesidade bázika ba maluk defisiénsia sira iha suku Lour.

Defisiénsia Cornélio de Araújo kontente tanba bele hetan tulun no nia sujere atu apoiu mis nesesidade sira seluk hanesan mina no seluk tan.

Tuir planu, KDESTO mós sei distribui nesesidade bázikaba ema ho defisiénsia na’in-59  iha suku Beco postu Suai.

Notísia relevante: Apoia nesesidade bázika ba KDESTO Covalima bele hakmaan sira-nian difikuldade

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!