DILI, 09 fevereiru 2024 (TATOLI)—Jerente iha Autoridade Mineiru, Institutu Públiku (ANM, I.P) simu pedidu hosi empreza ba autorizasaun materiál projetu konstrusaun Marina Square.
“Sira identifika ona fatin balun iha Liquiçá ne’ebá, katak fatin sira ne’e sira interrese atu esplora materiál konstrusaun, liu-liu fatuk, ne’ebé prosesu ne’e la’o hela tanba sira foin aprosima ami iha semana kotuk ne’e,” Prezidente ANM, I.P, Rafael Danilson de Araújo, informa ba Agência Tatoli, iha ninia knaar fatin, City 8, Manleuana, sesta ne’e.
Notísia relevante : Empreza Vico Construction planeia hahú konstrusaun Marina Square iha outubru 2023
Nia reforsa katak, ANM mak iha kompeténsia hodi autoriza empreza sira bele uza materiál sira ne’e nu’udar materiál konstrusaun nian, maibé kona-ba kualidade la’ós institutu ne’e nia kompeténsia maibé Ministériu Obra Públika no Ajénsia Dezenvolvimentu Nasionál (ADN).
“Marina Square tenke hetan lisensa tipu rua hanesan lisensa ambientál ne’ebé atribui hosi Autoridade Nasionál Lisensa Ambientál (ANLA) nomós lisensa minerál ka autorizasaun mineiru. Nune’e, molok atribui lisensa ekipa sei tun uluk ba terrenu hodi halo verifikasaun,” nia akresenta.
Empreza Vico Construction hosi nasaun Xina sai manán-na’in hodi implementa projetu Marina Square. Governu no empreza hatuur fatuk dahuluk ba projetu konstrusaun iha loron 17 maiu 2022, ne’ebé lansa hosi antigu Primeiru Ministru, Taur Matan Ruak.
Área konstrusaun lokaliza iha antiga rezidénsia saudozu Francisco Xavier do Amaral, Bidau Lecidere.
Empreza Timor Marina Square, S.A, orijen hosi nasaun Singapura, hanesan responsável projetu ne’ebé tau prioridade investimentu iha setór turizmu hodi realiza investimentu ho kapitál investimentu millaun $50.
Projetu ne’e, sei kria empregu 170 imediatu no bainhira realiza obra konstrusaun durante faze operasionál sei kria empregu 250 ne’ebé liga diretamente ba projetu.
Timor-oan ne’ebé sei serbisu iha faze dahuluk hamutuk 100, enkuantu sidadaun estranjeiru na’in-180 mai hosi Xina, Índia no Srilanka.
Aleinde ne’e, sei loke oportunidade empregu foun no negósiu sira hodi hamosu vaga servisu iha transporte, komérsiu, lojístika no tékniku no finanseiru sira.
Iha mós oportunidade foun ba formasaun no kapasitasaun institusionál, ne’ebé uza prátika di’ak liu ba atendimentu no servisu internasionál, sei hasa’e padraun no nível kualidade iha oferta indústria oteleira Timor-Leste.
Jornalista : Antónia Gusmão
Editora : Julia Chatarina
