iklan

NASIONÁL, EKONOMIA, HEADLINE

Governu no parseiru sei halo diskusaun revee dezeñu dezenvolvimentu Aeroportu Comoro

Governu no parseiru sei halo diskusaun revee dezeñu dezenvolvimentu Aeroportu Comoro

Ministru Planeamentu Investimentu no Estratéjiku, Gastão Sousa. Imajen Tatoli/António Daciparu

DILI, 09 fevereiru 2024 (TATOLI)—Governu liuhosi Primeiru-Ministru, Kay Rala Xanana Gusmão, akompaña ho ekipa sei konvoka reuniaun ho parseiru internasionál atu halo revizaun ba dezeñu dezenvolvimentu Aeroportu Internasionál Prezidente Nicolau Lobato, Comoro.

“Primeiru-Ministru haree liubá projetu Aeroportu Dili, tanba ne’e maka diskute ho International Finance Corporation (IFC) ho Banku Mundiál, ne’ebé ami sei halo revizaun ida tantu ba kustu no dezeñu sira, ami sei aprezenta foun fali dezeñu aeroportu internasionál ne’e nian,” Ministru Planeamentu Investimentu no Estratéjiku, Gastão Sousa, relata hafoin ramata reuniaun ho Xefe Governu, iha Palásiu Governu, sesta ne’e.

Ekipa ne’ebé sei halo revizaun lidera direta hosi Primeiru-Ministru inklui ministériu sira ne’ebé iha ligasaun ho projetu ne’e.

“Tanba haree ba osan boot, ne’ebé sei halo revizaun tanba ita presiza buat barak atu hadi’a povu-nia moris, maski aeroportu mós kondisaun ida importante ba dezenvolvimentu nasaun maibé presiza haree uluk povu-nia moris molok deside buat boot,” nia akresenta.

Notísia relevante : Dezenvolvimentu Aeroportu Comoro iha prosesu nia laran

Governante ne’e dehan, orsamentu ba dezenvolvimentu aeroportu bele foti hosi empréstimu ou Orsamentu Jerál Estadu rasik.

VIII Governu Konstitusionál selebra ona kontratu  iha loron 29 maiu 2023, ho empreza tolu ne’ebé sei halo dezenvolvimentu ba Aeroportu Comoro.

Dezenvolvimentu aeroportu sei hahú hosi pista, taxiway, torre kontrolu no área estasiona aeronave iha Aeroportu Comoro, ne’ebé daudaun pista aviaun ho naruk metru 1.800,50 no sei estende ba metru 2.100.

Antes ne’e Governu deside ona prosedimentu aprovizionamentu infraestrutura Aeroportu Comoro, nune’e liuhosi prosesu naruk empreza manán-na’in iha rua hosi Indonézia, empreza PT Waskita Karya sei haree kona-ba konstrusaun infraestrutura ho kustu projetu millaun $72,5, enkuantu empreza PT Amythas haree liu ba jestaun ho kustu projetu millaun $6,28.

Enkuantu, empreza Japaun sei harii terminál pasajeiru ho kustu projetu millaun $385,62, ne’ebé orsamentu ne’e prevee hosi Estadu no povu Japaun.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!