iklan

HEADLINE, SEGURANSA

Polísia Tránzitu rekolla reseita $72.693 iha janeiru

Polísia Tránzitu rekolla reseita $72.693 iha janeiru

Polísia Nasionál Timor-Leste (PNTL), liuhisi Tránzitu Nasionál Munisípiu Dili, halo apreensaun ba motór sira ne'ebé para kontra sinál tránzitu iha estrada-ibun Embaisxda Portugál nia sorin, kuarta (06/02). Imajen/Francisco Sony

DILI, 09 fevereiru 2024 (TATOLI) – Polísia Tránzitu no Seguransa Rodoviária rekolla, iha janeiru, reseita hamutuk $72.693 ba kofre Estadu. Reseita ne’e mai husi infrasaun sira no veíkulu sira ne’ebé tama husi pontu entrada fronteira terrestre nian iha Batugadé iha Bobonaro, Mota-Masin iha Covalima no Sakato iha Oé-Cusse.

“Husi reseita infrasaun nian ita rekolla hamutuk $59.93  no pontu entrada fronteira terrestre tolu ne’e ita arrekada $12.758”, Xefe Departamentu Seguransa Rodoviária, Superintende Asistente Polísia Luís da Costa, dehan iha Caicoli.

Husi reseita infrasaun ne’ebé Polísia Tránzitu hatama ne’e inklui ho totál evidénsia hamutuk 1.887 ne’ebé polísia halo apreensaun iha nivel munisípiu ne’ebé fahe ba kategória tolu mak hanesan transporte Estadu iha tolu, privadu 1.189 no públiku 85, nomós dokumentu hamutuk 610.

“Infratór sira komete mak la uza kapasete, kontra orden autoridade, kontra sinál tránzitu, la lori dokumentu no karta inspesaun liu ona prazu. Ho nune’e bele dehan katak iha janeiru ne’e infratór ne’ebé komete infrasaun hamutuk 1.885 no sira ne’e hetan ona sansaun husi polísia hodi bá selu multa iha banku foin iha 1.494 maka selu, enkuantu 391 to’o agora seidauk”, xefe departamentu ne’e informa.

Ba infratór sira ne’ebé mak seidauk bá selu iha banku, Polísia Tránzitu sei haruka karta ida ba Diresaun Nasionál Transporte Terrestre atu trava sira-nian dokumentu. Multa ne’ebé maka infratór sira selu ne’e nia durasaun loron 90, signifika fulan tolu. Kuandu liuhusi tempu ne’ebé determina maka infratór sira la kumpre hodi bá selu iha banku, polísia sei halo koordenasaun ho Patrímoniu Estadu hodi bele legaliza evidénsia sira ne’ebé la selu ne’e hodi tama ba prosesu tuir lei ne’ebé vigora.

Kona-ba viatura sira ne’ebé tama liuhusi fronteira terrestre iha janeiru hamutuk 1.079, kompostu husi veíkulu pezadu iha 601 no lizeiru 478.

Notísia relevante: PNTL sei maximiza servisu tránzitu to’o postu administrativu sira iha 2024

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!