iklan

DEFEZA, HEADLINE, MUNISÍPIU, OÉ-CUSSE (RAEOA), SEGURANSA

Rogério Lobato husu PNTL no F-FDTL ezerse funsaun ho profisionalizmu

Rogério Lobato husu PNTL no F-FDTL ezerse funsaun ho profisionalizmu

Prezidente Autoridade RAEOA, Rogerio Tiago Lobato, hala’o enkontru ofisial ho atutoridade defeza no seguransa iha Oe-Cusse. Imajen Tatoli/Abilio Elo Niniz Elo Nini.

OÉ-CUSSE, 09 fevereiru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, husu ba Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ne’ebé destaka iha Oé-Cusse atu ezerse funsaun ho profisionalizmu.

Notísia relevante:PNTL Oé-Cusse kontribui $31,042.00 ba kofre Estadu

Rogério Tiago Lobato, ko’alia asuntu ne’e hafoin enkontru ofisiál ho komandante sira hosi PNTL, F-FDTL, Polísia Unidade Marrítima (UPM), Batallaun Orden Públika (BOP) no Migrasaun iha Gabinete Autoridade RAEOA, kinta ne’e.

“Ohin ita enkontru dahuluk ho sira, primeiru mensajen ita hato’o maka ne’e, parte seguransa tenke servisu ho profisionalizmu, ita rona iha rai boot dalaruma polísia baku sivíl, sira uza kilat arbiru, maibé iha-ne’e infelismente buat sira-ne’e la akontese, no ha’u husu ba komandante sira atu ezerse sira-nia funsaun ho profisionalizmu,” Rogério Tiago Lobato, ba jornalista sira hafoin enkontru.

 

Durante enkontru ne’e parte autoridade seguransa hato’o relatóriu relasaun ho situasaun seguransa iha Oé-Cusse, inklui difikuldadade ne’ebé enfrenta iha servisu fatin.

Eis Ministru Interiór ne’e kontente rona relatóriu hosi autoridade seguransa, ne’e duni hosi ne’e ba oin, buat-ne’ebé bele halo hanesan Prezidente Autoridade.

“Naturalmente, tuir lei foun ne’ebé sai, sira-ne’e estruturalmente tutela ba Ministériu Interiór no Ministériu Defeza, maibé sira mai servisu iha Oé-Cusse, tenke servisu ho Prezidente Autoridade atu garante seguransa trankuilidade mai iha Oé-Cusse, ne’ebé ha’u sente katak, buat-ne’ebé ha’u bele halo, sei ko’alia ho sira-nia ministériu atu fó meiu ba sira atu servisu,” nia informa.

Komandante PNTL Oé-Cusse, Superintendente Polísia, Nicolau Francelino da Costa, agradese tanba dahuluk parte seguransa relata relatóriu komandu nian ba Autoridade RAEOA, nune’e bele konsidera atu apoia melloramentu servisu.

“Ami komandu PNTL hamutuk ho forsa destakadu sira, ohin ami mai hala’o enkontru dahuluk ho Prezidente Autoridade, ohin ami informa kona-bá situasaun seguransa iha Oé-Cusse no aprezenta difikuldade ne’ebé komandu enfrenta iha fatin servisu,” nia katak.

Nia hateten, difikuldade parte seguránsa relata iha enkontru ofisiál ne’e, kona-bá transporte no fatin servisu, liuliu iha komandu rejionál no terrenu, tanba antes ne’e simu ona orientasaun hosi Prezidente Autoridade katak, presiza aprezenta relatóriu komesa hosi totál membru mai to’o servisu administrasaun sira.

Notísia relevante: PNTL sei koordena DRTT regula bisikleta elétrika sirkula iha Oé-Cusse

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!