iklan

COVALIMA, HEADLINE

Tratór ualu iha Sentru Sanfuk avaria maka difikulta serbisu iha époka daruak

Tratór ualu iha Sentru Sanfuk avaria maka difikulta serbisu iha époka daruak

Tratór avaria. Imajen/Celestina Teles.

COVALIMA, 09  fevereiru 2024 (TATOLI) – Sentru Tratór Sanfuk Covalima daudaun ne’e iha de’it tratór sia ne’ebé mak atende hela agrikultór sira-nian pedidu ba fila rai époka daruak nian, entre fulan marsu no abríl, tanba ualu avaria totál. Tanba ne’e, sentru iha difikuldade hodi jere ekipamentu ne’e tanba lasufisiente.

Diretór Servisu Agrikultura Covalima, Lino Magno, relata katak iha sentru ne’e eziste tratór unidade 30 –  lima halo ona lelaun iha tinan 2023 no sei iha 25 ne’ebé atende ona agrikultór sira iha époka dahuluk, maibé ba daruak  sia de’it mak halo operasaun hodi fila komunidade nia to’os.

“Atu fila komunidade sira-nian to’os iha époka daruak, tratór la sufisiénte ona, tanba husi tratór unidade 17 refere sia de’it mak bele halo operasaun no  ualu avaria totál no to’o agora seidauk halo manutensaun tanba laiha orsamentu no bainhira atu halo manutensaun tenke submete  proposta ba iha nasionál hafoin loke konkursu”, Lino Magno esplika.

Tanba difísil atu halo jestaun ba tratór sira ne’e maka sentru ne’e sei uza mekanizmu hodi koloka ekipamentu unidade haat iha postu Zumalai, tolu iha Tilomar no rua 2 iha Suai no Maucatar hodi atende to’os-na’in sira.

Kona-ba problema tratór sira ne’e, eis-diretór servisu Agrikultura mós submete ona proposta ba iha Ministériu Agikultura no Peska (MAP), maibé to’o ohin loron seidauk iha responde.

Dadaun ne’e, funsionáriu na’in-10 mak hala’o atividade fila rai ne’ebé kompostu husi tratorista na’in-ualu no mekániku rua. Ba funsionáriu kontradu na’in-24 kompostu husi ajente administrativu la serbisu ona tanba seidauk estende kontratu.

Iha sorin seluk, Diretór Servisu Munisipál Administrasaun Rekusu Umanu, José Manuel Gonçalves, hatete dadaun ne’e sei halo avaliasaun dezempeñu kona-ba funsionáriu kontratadu no ajente administrasaun sira ne’ebé nia kontratu remata iha loron 31 dezembru tinan 2023.

Rekorde katak, iha fulan-agostu no dezembru 2023, Sentru Sanfuk halo ona atendimentu fila agrikultór 197 nia rai hamutuk ektare 145.99.

Notísia relevante: Agrikultór Covalima kontribui osan sosa bateria tratór hodi bele fila rai

 Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!