COVALIMA, 12 fevereiru 2024 (TATOLI) – Aldeia Pelet no Somo-Kanua, iha suku Lour, iha postu Zumalai-Covalima, seidauk asesu ba eletrisidade no estrada. Populasaun iha aldeia rua ne’e uza de’it lampu tradisionál iha tempo kalan hodi halo atividade.
Kona-ba estrada ne’ebé seidauk tama to’o aldeia rua ne’e difikulta abitante sira atu lori sira-nian produtu bá fa’an iha merkadu iha kapitál munisípiu nian hodi bele sustenta nesesidade família.
Aldeia Pelet ho nia xefe família hamutuk 156 no Somo-Kanua iha 120-resin ne’e seidauk asesu ba infraestrutura bázika dezde Timor-Leste ukun-aan. “Ha’u-nian komunidade iha aldeia hahú okupasaun Indoneziamoris iha nakukun laran nomós la goza husi ukun-rasik ida-ne’e, tanba seidauk asesu mós estrada”, Xefe Aldeia, Somo-Kanua Flávio Branco, lamenta.
Iha sorin seluk, xefe aldeia Pelet, Carlito Tilman Barreto, reforsa katak abitante ne’ebé hela iha Pelet halelerik ba infraestrutura bázika, tanba to’o ohin loron seidauk asesu ba estrada, eletrisidade no bee-moos.
Ho problema ne’ebé mak populasaun enfrenta maka xefe aldeia iha responsabilidade hato’o bebeik ona proposta ba iha munisípiuto’o iha nasionál, maibé to’o ohin loron seidauk iha resposta. Tanba ne’e, nia husu nafatin ba ministériu kompetente atu fó prioridade hodi hadi’a estrada, dada eletrisidade nomós bee-moos ba komunidade.
Hatán ba kestaun ne’e, Administradór Postu Zumalai, Alípio Magno, rekoñese katak komunidade iha aldeia rua ne’e seidauk asesu ba eletrisidade, estrada no bee-moos, nune’e iha nia mandatu sei halo levantamentu dadus hodi bele responde ba preokupasaun sira ne’e.
“ Ha’u sei halo koordenasaun hodi halo planu iha nivél postu administrativu nune’e bele aprenzenta iha munisípiu hodi bele responde ba komunidadade nia preokupasaun ho fazeadamente”, nia promete.
Tuir dadus Eletrisidade Timor-Leste, Empreza Públika (EDTL.E,P) Covalima, iha munisípiu ne’e iha suku 30 no aldeia 148, husi nímeru ne’e aldeia 119 mak asesu ona eletrisidade no sei falta 29.
Liga ba estrada, eis-Diretór Obra Públika no Transporte, Alberto Cardoso, antes ne’e fó sai katak komunidade iha postu administrativu Fatululik, Fatumea, Fohorem, Tilomar, Maucatar, Suai no Zumalai asesu ona estrada rurál, maibé iha tempu udan mak difísil atu halo movimentu, tanba estrada nakonu ho tahu.
Notísia relevante: Aldeia lima iha Suai presiza infraestrutura bázika
Jornalista: Celestina Teles
Editora: Maria Auxiliadora
