iklan

NASIONÁL, EDUKASAUN, DILI

Aplikante 8.601 konkorre bolsa rekrutamentu ba profesór

Aplikante 8.601 konkorre bolsa rekrutamentu ba profesór

Ministériu Edukasaun liuhosi Portavós Gabinete Ministériu Edukasaun (ME), Filipe Rodrigues Pereira, hato’o rezultadu aplikasaun bolsa rekrutamentu (kandidatu) ba dosente no profesór liuhosi konferénsia imprensa iha ne’ebé hala’o iha salaun Ministériu Edukasaun (ME), Vila Verde, segunda (12 fevereiru 2024). Imajen Tatoli/Osória Marques.

DILI, 12 fevereiru 2024 (TATOLI)—Portavós Gabinete Ministériu Edukasaun (ME), Filipe Rodrigues Pereira, hateten rezultadu aplikasaun bolsa rekrutamentu (kandidatu) ba dosente no profesór ne’e hatudu iha profesór 8.601iha territóriu nasionál mak konkorre hodi prienxe vaga refere.

Notísia Relevante: ME mantein desizaun hodi fó oportunidade ba kontratadu sira konkorre bolsa rekrutamentu

“Totál aplikante hamutuk 8.601 kompostu hosi feto 4.916 no mane 3.685. Aplikante feto barak liu mak kompete. Ida-ne’e ita kontente tanba inan-feton hola parte ba prosesu ensinu iha futuru maibé sei liuhusi prosesu selesaun nune’e hein prosesu verifikasaun selesaun hotu hafoin anúnsia iha kalendáriu,” Portavós ne’e hateten ba jornalista sita lihosi konferénsia imprensa iha ME, Vila Verde, segunda ne’e.

Ba prosesu hirak-ne’e, Ministériu Edukasaun servisu hamutuk ho Komisaun Funsaun Públika no mós Organziasaun BELUN, nune’e ohin (segunda, 12 janeiru 2024) bele fó sai totál aplikante.

Portavós ne’e hatutan, atu konkorre ba vaga ne’e presiza de’it mak abilitasaun literária, fotografia no kartaun identidade.

Direitora Rekursu Umanu iha Ministériu Edukasaun (ME), Anita Tavares Ribeiro de Jesus, hateten agora prosesu verifikasaun la’o namanas hela no bainhira ramata mak sei anúnsia aplikante admitidu no la admitidu ne’e ba públiku.

“Depois anúnsia kandidatu bolsa profesór admitidu no la admitidu ne’e sai kedas ho nia razaun pasa no la passa. Ezemplu, kandidatu ida mak aneksa ho diploma sekundáriu nian mak konserteza sei la pasa tanba lei la la admite. Kandidatu sei haree nia valór bainhira sai hosi sala teste nian,” nia dehan.

Tanba, tuir nia, vaga ne’e tuir sistema klasifikasaun no tuir lugares ne’ebé edukasaun fó sai, tanba lugares ne’e hamutuk 2.400 ne’ebé fahe ba grupu pré-eskolar, grupu primeiru, segundu no terseiru siklu ho nia matéria sira.

Data rejistu ba bolsa rekrutamentu (kandidatu) profesór hahú loke iha 29 janeiru2024 to’o 09 fevereiru 2024.

Notísia Relevante: Vaga ba bolsa rekrutamentu ba profesór sira fó sai iha fevereiru

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!