DILI, 18 janeiru 2024 (TATOLI) – Asaun pasífika ne’ebé profesór kontratadu sira halo hasoru Ministériu Edukasaun (ME) hodi husu sira-nian direitu atu tama ba ingresu espesiál ne’e Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lemos, konsidera ne’e direitu sidadaun nian, maibé ministériu mantein desizaun hodi fó oportunidade ba manorin sira konkorre iha bolsa rekrutamentu ne’ebé sei anunsia iha fevereiru.
Governante ne’e esplika katak desizaun ne’ebé maka ministériu hatún ona bazeia ba Dekretu-lei númeru 31/2023, 31 maiu, kona-ba Rejime Karreira Dosente nian.
“Pozisaun Ministeriu Edukasaun nia klaru ho desizaun ne’ebé maka foti ona tanba halo konsulta ho dekretu-lei sira. Planu ministériu nia katak profesór kontratadu sira sei iha oportunidade atu tuir fali vaga bolsa kandidatu hodi sai fali manorin ho rekoñesimentu husi Ministériu Edukasaun”, governante ne’e asegura.
Sekretáriu Estadu hato’o deklarasaun ida ne’e liga ba profesór 1.499 ne’ebé hato’o nia ezijénsia ba ME liuhusi asaun pasífika ne’ebé hala’o iha loron hirak ne’e no konferénsia imprensa ne’ebé realiza ohin iha Jardín 5 de Maio hodi ezije sira-nian direitu ba avaliasaun dezempeñu atu tama ba ingresu espesiál.
Iha konferénsia ne’e, portavós profesór kontratadu, Agostinho Pinto, hato’o katak manorin rihun-resin ne’ebé nia kontratu termina ona iha 31 de dezembru 2023 sei halo asaun pasifika iha 22 janeiru 2024 hasoru Ministra Edukasaun, Dulce de Jesus no Sekretáriu Estadu bainhira la rezolve sira-nian problema.
“Ami profesór kontratadu 2023 hamutuk rihun ida-resin ne’e lamenta atitude superiór na’in-rua nian ne’ebé la respeita ona valór boa governasaun nomós la asegura direitu sidadaun nian, tanba desizaun ne’ebé sira foti laharee ba vantajen no dezvantajen ne’ebé hatudu realidade katak daudaun ne’e iha eskola públika balun taka ona tanba laiha profesór”, Agostinho Pinto dehan iha Jardín 5 de Maiu, ohin.
Tanba ne’e, nia ezije ba ME atu rezolve problema profesór kontratadu 2023 nian no la’ós atu hapara fali profesór sira. Nia husu mós atu rezolve estatutu profesór 2023 tuir Dekretu-lei númeru 31/2023, 31 maiu kona-ba Estatutu Karreira Pofesór ne’ebé previstu ona iha artigu 11.
“Husu ba superiór na’in-rua ne’e atu rezolve uluk problema profesór kontratadu 2023 molok loke teste ba bolsa kandidatu ba públiku. Karik dirijente na’in-rua ne’e maka la presta vontade hodi rezolve problema, asaun ne’ebé profesór sira sei halo maka realiza marsa pasifika ne’ebé sei halo iha loron 22 de janeiru, inklui sei hato’o petisaun ba Ministra Edukasaun no Sekretáriu Estado iha tempu badak”, afirma.
Rekorde katak Diretora Nasionál Rekursu Umanu, Anita Tavares de Jesus, antes ne’e hatete manorin kontratadu sira ne’e la prienxe rekizitu ne’ebé maka hatuur iha Dekretu-lei númeru 31/2023 kona-ba Rejime Karreira Dosente, tanba ne’e laiha avaliasaun dezempeñu ba sira atu tama iha rejime espesiál ne’e.
“Ha’u husu ba ita-nian profesór 1.499 ne’ebé lahetan avaliasaun dezempeñu ne’e atu hakmatek tanba ministériu iha ona polítika ida di’ak ba futuru atu garante moris di’ak ba profesór sira ne’e. Ha’u fiar katak ho bolsa kandidatu ne’ebé tempu besik sei loke ne’e oportunidade boot liu ba ita-nian profesór sira ne’e”, diretora dehan foin lalais ne’e.
Ministériu Edukasaun sei fó sai, iha fevereiru, vaga ba bolsa rekrutamentu faze dahuluk ba manorin sira iha nivel ensinu pré-eskolár no báziku hamutuk 1.500. Bolsa refere ezije teste dijitál atubele garante transparánsia no seriedade ba rekrutamentu kandidatu sira. Vaga ba manorin sekundáriu jerál no tékniku vokasionál sei iha fali faze daruak.
Notísia relevante: Vaga ba bolsa rekrutamentu ba profesór sira fó sai iha fevereiru
Jornalista: Tomé Amado
Editora: Maria Auxiliadora
