iklan

NASIONÁL, HEADLINE

Atualizada: Anin no udan afeta ba uma 166 no ema ida lakon vida

Atualizada: Anin no udan afeta ba uma 166 no ema ida lakon vida

Uma Naroman ba Povu (UNP) ne’ebé hetan estragu hosi dezastre naturál iha Ainaro. Imajen/Espesiál.

DILI, 12 fevereiru 2024 (TATOLI) – Anin no udan ne’ebé akontese, entre loron 06 no 12 fevereiru, provoka inundasaun no anin sobu uma hamutuk 166 iha territóriu no ema ida lakon vida tanba tata husi Lafahek, relata dadus husi Autoridade Protesaun Sivíl (APC, sigla portugés).

Dadus hatudu katak iha Aileu rai halai danifika uma ida, Ainaro anin sobu uma 119, ahi-han uma rua no uma ida hetan inundasaun.  Baucau anin sobu uma ida no ema ida lakon vida, Bobonaro anin sobu uma neen, rai halai danifika uma tolu, Ermera anin sobu uma 31 no rai halai estraga uma hitu.

Iha Lautém anin sobu uma rua, Liquiçá  neen no rai halai afeta uma ida, Manufahi anin sobu uma tolu, Oé-Cusse hitu, Viqueque 13 no ahi-han uma ida no Manatuto ahi han uma ida.

Xefe Gabinete Relasaun Esterna no Komunikasaun, Cesário da Silva Marques, hatete dezastre naturál ne’ebé akontese ne’e ekipa protesaun sivíl husi kada munisípiu kontinua apoia ai-han emerjénsia hanesan foos, masin, supermie no sasan uma-laran hanesan balde, fugaun, sana no tasu hodi tulun vítima sira atu sustenta hela nesesidade família nian.

APC mós akumula hotu dadus dezastre naturál ne’ebé akontese husi janeiru to’o 12 fevereiru ne’eb rejista vítima hamutuk 835 no husi númeru ne’e ema 783 hetan ona apoiu emerjénsia no falta 52 maka seidauk, tanba APC sei halo hela prosesu verifikasaun ba dadus sira.

Ba vítima sira ne’e, APC mós disponibiliza ona materiál emrjénsia ba uma hamutuk 310 ne’ebé rejista husi munisípiu Aileu, Lautém, Ermera no Ainaro.

Ba uma sira seluk ekipa sei halo verifikasaun atu hetan dadus loloos,nune’e bainhira Governu deside fó apoiu matérial karik fornese duni ba família ne’ebé presiza.

Notísia relevante: Dadus APC: Uma 130 mak danifika kauza husi dezastre naturál

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!