COVALIMA, 12 fevereiru 2024 (TATOLI) – Administradór Munisípiu Covalima, Francisco de Andrade, husu ba Diretór Servisu Munisipál Edukasaun, Elfa Fátima, atu akompaña implementasaun Programa Ensinu Rekorrente iha munisípiu refere tanba kada tinan aloka osan maibé laharee estudante iha terrenu.
“Ita presiza atu haree Programa Ensinu Rekorrente, tanba kada tinan aloka orsamentu maibé bainhira ita tun bá tereñu ita la haree ema-ida”, Francisco de Andrade lamenta, ohin.
Nia lembra katak, iha 2023, bainhira autoridade halo fiskalizasaun iha suku Suai Loro laiha rma hodi hala’o prosesu ensinu-aprendizajen, maibé simu de’it mak relatóriu, tanba ne’e presiza atu kontrola ho rigór.
Xefe suku Zulo, João Lopes de Carvalho, mós reforsa katak, iha realidade, implementasaun programa refere iha tereñu hatudu ferik katuas simu osan nafatin, maibé lahatene asina naran.
“Tuir ami-nian haree eskola ensinu rekorrente liha balansu, tanba amá sira ne’ebé simu osan idozu nafatin lahatene asina no haneha nafatin, entaun presiza atu haree didi’ak programa refere. Presiza halo avaliasaun”, nia fó hanoin.
Hatán ba preokupasaun refere, Diretora Servisu Edukasaun Munisípiu Covalima, Elda Fátima, promete sei observa direta implementasaun Programa Ensinu Rekorrente hodi hala’o atividade alfabetizasaun ba adultu sira.“Ita observa iha terrenu la’o ka la’e? Se la la’o ita sei halo avaliasaun hodi foti medida”, dehan.
Bazea ba dadus hahú husi 2018 to’o 2023, totál formandu husi postu administrativu Fatululik, Fatumea, Fohorem, Tilomar, Maucatar, Suai no Zumalai hamutuk 1.026, husi númeru ne’e formandu ne’ebé tuir avaliasaun hatene letra no lee uitoan hamutuk 535 ka 52% no formandu ne’ebé la tuir avaliasaun finál hamutuk 491 ka 48%.
Orsamentu Jerál Estadu ba tinan 2024 aloka Servisu Edukasaun Covalima hamutuk $ 1,843.785 husi verba ne’e prevee ba Programa Ensinu Rekorrente hodi hala’o atividade alfabetizasaun ba adultu sira hamutuk $41.280.
Ensinu Rekorrente destina ba indivíduu sira ne’ebé ultrapasa idade indikada ba frekuénsia atu tuir ensinu báziku no sekundáriu, sira ne’ebé kompleta ona ensinu báziku no idade liu ona entre tinan 16 no 18, nomós sira ne’ebé seidauk iha oportunidade atu enkuadra iha edukasaun eskolár iha idade normál ba formasaun.
Notísia relevante: CNCTI husu Governu investe iha ensinu rekorrente
Jornalista: Celestina Teles
Editora: Maria Auxiliadora
